O‘zbekistonda 2021-yilning yanvaridan aprel oyiga qadar daraxt va butalarning noqonuniy kesilishi bilan bog‘liq 2014 ta qonunbuzilish holati aniqlandi. Bu haqda Ekologiya va atrof-muhitni muhofaza qilish davlat qo‘mitasi axborot xizmati rahbari Ozod Rajabov AOKAda o‘tkazilgan brifingda ma’lum qildi.
Uning so‘zlariga ko‘ra, sodir etilgan ekologik qoidabuzarliklar natijasida o‘simliklar dunyosiga 4,98 milliard so‘m miqdorida zarar yetkazilgan.
“1313 ta tup qimmatli daraxt noqonuniy ravishda kesilgani, 619 ta tup daraxt shikastlantirilgani yuzasidan huquqbuzarlarga nisbatan 2 milliard 514 million so‘m ma’muriy jarima belgilanib, o‘simlik dunyosiga yetkazilgan zarar jami 4 milliard 988 million so‘m miqdorida hisoblandi”, — deydi Rajabov.
Matbuot kotibining ta’kidlashicha, moratoriy davomida 5609 jismoniy va yuridik shaxslar o‘rmon fondiga kiritilmagan deyarli 260 ming tup daraxt va butalarni kesishga ruxsat so‘ragan. Shu bilan birga, Davlat ekologiya qo‘mitasi 182 mingdan ortiq daraxtlarni, jumladan 91 ming tupi qimmatbaho turlarni kesishga ruxsat berishni rad etgan.
Eslatib o‘tamiz, fevral boshida davlat o‘rmon fondi tarkibiga kirmaydigan qimmatbaho daraxt va buta turlarini kesishga moratoriy 2021-yil 31-dekabrgacha uzaytirilgan edi.
Mavzuga doir:
- Davlat ekologiya qo‘mitasi moratoriy davrida Samarqandda kesilgan chinor daraxti uchun jami 56,3 mln so‘m jarima undirilishini ma’lum qildi
- Toshkentda bir asrlik eman daraxti kesilishining oldi olindi
- Qarshidagi istirohat bog‘ida daraxtlarni kesgan Obodonlashtirish boshqarmasi xodimlari ogohlantirishga qaramay, yana daraxt kesgani aniqlandi
Izoh (0)