Sud boshqaruvchilarining qarzdorlarni bankrot deya e’lon qilish jarayonidagi ishi qayta ko‘rib chiqiladi. Bu haqda moliya vaziri Timur Ishmetov Oliy Majlis Senatining 15-yalpi majlisida ma’lum qildi, deb xabar beradi “Gazeta.uz”.
Senat raisi Tanzila Norboyeva hujjatlarni rasmiylashtirib, korxona va tashkilotni bankrot deya tan olish uchun sudga beradigan sud boshqaruvchilariga mukofot pullari ko‘p to‘lanishini tanqid qilgan.
Uning so‘zlariga ko‘ra, 2019—2020-yillar davomida 10 mingga yaqin korxona va tashkilot bankrotlikning soddalashtirilgan jarayoni asosida yopilgan. Shu bilan birga, budjet hisobida qarzlarni undirish ko‘rsatkichi 0,07 foizni tashkil etgan.
“Ayni vaqtda sud boshqaruvchilariga respublika va mahalliy budjetdan katta mukofot pullar to‘lanmoqda. Ya’ni sud boshqaruvchilariga to‘lanadigan mablag‘, ular yordamida budjetga to‘plangan mablag‘dan bir necha barobar ko‘p. Farq shu qadar kattaligidan, ushbu raqamlarni aytishni ham xohlamayman. Tegishli hujjatlarni qayta ko‘rib chiqish kerak. Chunki bu pullar davlat budjetiniki, bu pullar xalqniki”, — deydi Senat raisi moliya vaziriga murojaat qilib.
Ishmetovning so‘zlariga ko‘ra, hozirda “sud boshqaruvchilari qarzdor-tashkilotdan qarzni undirish o‘rniga, uni bankrotlik orqali yopishga urinmoqda”, chunki har bir yopilgan ish uchun katta miqdorda mukofot puli to‘lanadi.
“Biroq ular asosan sudda hujjatlar va bankrotlikni e’lon qilish amaliyoti bilan shug‘ullanadi, ya’ni qarzdor-tashkilotdan qarzni undirish o‘rniga, ‘bu umidsiz qarz, u bankrot bo‘lishi kerak’ deydi. Budjetga esa bir tiyin ham tushmaydi. Ammo ular har bir yakunlangan ish uchun 4,8 million so‘mdan oladi. Ayrim epchil sud boshqaruvchilari 100 million, 1 va 2 milliard so‘m olgan”, — deydi u.
“Shu sababli biz hukumatga murojaat qildik va o‘tgan chorakdan boshlab ushbu amaliyotni vaqtincha to‘xtatdik. Ushbu jarayonni qayta ko‘rib chiqish va mutlaqo boshqacha yo‘nalishni qabul qilish maqsadida Davlat aktivlarini boshqarish agentligi bilan ishlayapmiz”, — deydi moliya vaziri.
Eslatib o‘tamiz, 2019-yil 15-dekabrda “Bankrotlik to‘g‘risida”gi qonunga o‘zgartish va qo‘shimchalar kiritish to‘g‘risidagi qonun Prezident tomonidan imzolangan edi. Qonun bilan kiritilgan o‘zgartishlarga ko‘ra, bankrotlik to‘g‘risidagi ishni qo‘zg‘atish uchun beriladigan arizada qarzdor va kreditorlarga to‘lov qobiliyatini tiklash yoki tugatish tartibotlari qo‘llashni ko‘rsatgan holda murojaat etish huquqi berilgan.
Izoh (0)