Суд бошқарувчиларининг қарздорларни банкрот дея эълон қилиш жараёнидаги иши қайта кўриб чиқилади. Бу ҳақда молия вазири Тимур Ишметов Олий Мажлис Сенатининг 15-ялпи мажлисида маълум қилди, деб хабар беради «Gazeta.uz».
Сенат раиси Танзила Норбоева ҳужжатларни расмийлаштириб, корхона ва ташкилотни банкрот дея тан олиш учун судга берадиган суд бошқарувчиларига мукофот пуллари кўп тўланишини танқид қилган.
Унинг сўзларига кўра, 2019—2020 йиллар давомида 10 мингга яқин корхона ва ташкилот банкротликнинг соддалаштирилган жараёни асосида ёпилган. Шу билан бирга, бюджет ҳисобида қарзларни ундириш кўрсаткичи 0,07 фоизни ташкил этган.
«Айни вақтда суд бошқарувчиларига республика ва маҳаллий бюджетдан катта мукофот пуллар тўланмоқда. Яъни суд бошқарувчиларига тўланадиган маблағ, улар ёрдамида бюджетга тўпланган маблағдан бир неча баробар кўп. Фарқ шу қадар катталигидан, ушбу рақамларни айтишни ҳам хоҳламайман. Тегишли ҳужжатларни қайта кўриб чиқиш керак. Чунки бу пуллар давлат бюджетиники, бу пуллар халқники», — дейди Сенат раиси молия вазирига мурожаат қилиб.
Ишметовнинг сўзларига кўра, ҳозирда «суд бошқарувчилари қарздор-ташкилотдан қарзни ундириш ўрнига, уни банкротлик орқали ёпишга уринмоқда», чунки ҳар бир ёпилган иш учун катта миқдорда мукофот пули тўланади.
«Бироқ улар асосан судда ҳужжатлар ва банкротликни эълон қилиш амалиёти билан шуғулланади, яъни қарздор-ташкилотдан қарзни ундириш ўрнига, ‘бу умидсиз қарз, у банкрот бўлиши керак’ дейди. Бюджетга эса бир тийин ҳам тушмайди. Аммо улар ҳар бир якунланган иш учун 4,8 миллион сўмдан олади. Айрим эпчил суд бошқарувчилари 100 миллион, 1 ва 2 миллиард сўм олган», — дейди у.
«Шу сабабли биз ҳукуматга мурожаат қилдик ва ўтган чоракдан бошлаб ушбу амалиётни вақтинча тўхтатдик. Ушбу жараённи қайта кўриб чиқиш ва мутлақо бошқача йўналишни қабул қилиш мақсадида Давлат активларини бошқариш агентлиги билан ишлаяпмиз», — дейди молия вазири.
Эслатиб ўтамиз, 2019 йил 15 декабрда «Банкротлик тўғрисида»ги қонунга ўзгартиш ва қўшимчалар киритиш тўғрисидаги қонун Президент томонидан имзоланган эди. Қонун билан киритилган ўзгартишларга кўра, банкротлик тўғрисидаги ишни қўзғатиш учун бериладиган аризада қарздор ва кредиторларга тўлов қобилиятини тиклаш ёки тугатиш тартиботлари қўллашни кўрсатган ҳолда мурожаат этиш ҳуқуқи берилган.
Изоҳ (0)