Мактабгача таълим вазири коронавирусга қарши эмланди
Мактабгача таълим вазири Агриппина Шин 4 июнь куни коронавирусга қарши эмланди. Бу ҳақда вазирлик матбуот хизмати хабар берди.
Агриппина Шин билан бирга вазирлик ходимлари ҳам эмланган. Хабарга кўра, улар «Спутник V» вакцинасини олган. Ҳозиргача мактабгача таълим соҳасида фаолият юритаётган 104 мингга яқин ходим эмлангани таъкидланган.
Соғлиқни сақлаш вазирлиги маълумотларига кўра, мамлакатда жами эмланганлар сони 3 июнь куни 1 425 809 кишини ташкил этди. Бунин учун жами 2 243 591 доза вакцинадан фойдаланилди.
Мамлакатда июнь ойи охиригача 4 миллион кишини коронавирусга қарши эмлаш режалаштирилган. Биринчи навбатда 65 ёшдан юқори инсонлар, тиббиёт ходимлари, мактаб ўқитувчилари, мактабгача таълим муассасаси ходимлари ҳамда сурункали хасталиклар кузатиладиган фуқаролар коронавирусга қарши эмлаш жараёнларида иштирок этаётган эди. 31 майдан бошлаб ушбу рўйхатга чет элга ўқишга борадиган талабалар, оммавий ахборот воситалари (журналистлар, блогерлар), ёзувчилар, телерадиокомпанияда хизмат қилувчи ходимлар қўшилди.
Эслатиб ўтамиз, 3 май куни соғлиқни сақлаш вазири ўринбосари – Санитария-эпидемиологик осойишталик ва жамоат саломатлиги хизмати бошлиғи, бош давлат санитария врачи Баҳодир Юсупалиев коронавирус инфекциясига қарши ZF-UZ-VAC2001 вакцинаси билан эмланганди. 1 июнь куни Korzinka.uz супермаркетлар тармоғи асосчиси Зафар Ҳошимов коронавирусга қарши Pfizer/BioNTech вакцинасининг иккинчи дозаси билан эмланганини маълум қилди ва бошқаларга ҳам буни тавсия қилди.
