O‘zbekistonda 31-may kunidan boshlab COVID-19’ga qarshi emlanadigan fuqarolar ro‘yxatiga talabalar, OAV xodimlari va yozuvchilar qo‘shildi, deya ma’lum qildi Sanitariya-epidemiologik osoyishtalik va jamoat salomatligi xizmati xodimi Nasiba Toirova.
Birinchi navbatda 65 yoshdan yuqori insonlar, tibbiyot xodimlari, maktab o‘qituvchilari, maktabgacha ta’lim muassasasi xodimlari hamda surunkali xastaliklar kuzatiladigan fuqarolar koronavirusga qarshi emlash jarayonlarida ishtirok etayotgan edi.
Nasiba Toirova bergan ma’lumotga ko‘ra, 31-may kunidan boshlab ushbu ro‘yxatga:
- chet elga o‘qishga boradigan talabalar;
- ommaviy axborot vositalari (jurnalistlar, blogerlar);
- yozuvchilar;
- teleradiokompaniyada xizmat qiluvchi xodimlar qo‘shildi.
Mavzuga doir: “Xohishingizga qarshi sizni emlashga hech kimning haqqi yo‘q” — Innovatsion rivojlanish vazirligi
Eslatib o‘tamiz, emlash ixtiyoriy va bepul, vaksina olishdan bosh tortganlarga hech qanday chora ko‘rilmaydi. Mamlakatda iyun oyi oxirigacha 4 million kishini koronavirusga qarshi emlash rejalashtirilgan.
