Braziliya terma jamoasining futbolchilari Braziliya futbol konfederatsiyasi prezidenti Rojerio Kaboklo va bosh murabbiy Tite bilan Amerika Kubogida ishtirok etmaslik masalasini muhokama qildi.
Globo Esporte’ning xabariga ko‘ra, suhbat chorshanba kuni bo‘lib o‘tgan. Terma jamoaning faxriy futbolchilari musobaqa bo‘lib o‘tadigan joy Braziliyaga ko‘chganligi haqidagi xabarlarni birinchi bo‘lib ijtimoiy tarmoqlardan eshitganidan norozi bo‘lgan. Shu bilan birga ular Kubokda ishtirok etishdan bosh tortish masalasini o‘rtaga tashlagan.
Amerika Kubogi Kolumbiya va Argentinada bo‘lib o‘tishi ko‘zda tutilgan edi, lekin Kolumbiyadagi siyosiy vaziyat, Argentinadagi koronavirus bilan bog‘liq muammolar tufayli ikkala mamlakatda ham musobaqa o‘tkazilmaydigan bo‘ldi. Braziliyada ham COVID-19 bilan bog‘liq vaziyat murakkabligicha qolmoqda.
Tite matbuot anjumanida buni tasdiqladi, lekin futbolchilarning aniq pozitsiyasini gapirishni istamadi.
“Bizda aniq fikrlar bor, biz buni prezidentga jo‘natdik. Bu ochiq suhbat bo‘ldi. Qat’iy pozitsiyamiz bor, lekin buni barchaga ovoza qilishni istamaymiz”.
Futbolchilardan Ekvadorga qarshi o‘yinga diqqatini qaratishini so‘radik. Biz hozir yaxshi o‘yin ko‘rsatishimiz va g‘alaba qozonishimiz zarur.
Men savollarga javob berishdan qochmayman. Amerika Kubogi juda muhim. Ekavadorda qarshi bo‘ladigan o‘yinga jiddiy tayyorgarlik ko‘rishimiz lozim. Bizning pozitsiyamiz aniq. Sizlarni tushunaman, bu pozitsiya siz uchun ham muhim, javoblardan qochmayman”, — deydi murabbiy.
Matbuot anjumanida jamoa sardori Kazemiro ham ishtirok etishi ko‘zda tutilgandi. Ammo braziliyalik futbolchi jurnalistlar bilan uchrashuvda qatnashmadi.
Amerika Kubogi Braziliyada bo‘lib o‘tishi e’lon qilinganidan beri birorta futbolchi o‘z fikrini bildirmadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)