“Al-Jazira” klubi va BAA terma jamoasi hujumchisi Ali Mabxut terma jamoa safida gol urish bo‘yicha argentinalik hujumchi Lionel Messidan o‘zib ketdi.
JCh—2022 saralashi doirasida kechgan Malayziyaga qarshi uchrashuvda (4:0) Mabxut dubl qayd etdi. Bu uning BAA terma jamoasi safidagi 72 va 73-gollari edi. Shu tariqa 30 yoshli hujumchi terma jamoalar tarixidagi eng yaxshi to‘purarlar ro‘yxatida 8-o‘ringa chiqib oldi.
O‘z navbatida Messi ham Argentinaning Chiliga qarshi o‘yinida (1:1) gol urib, terma jamoa safidagi gollari sonini 72 taga yetkazib oldi va hindistonlik Sunil Chhetridan (71) o‘zib ketdi.
Hozirda to‘p surayotgan futbolchilar orasida Mabxut ikkinchi o‘rinda bormoqda. Undan oldinda faqat Portugaliya terma jamoasi hujumchisi Krishtianu Ronaldu (103 ta gol) bor.
Eronlik Ali Dayi terma jamoa safida gollar urish bo‘yicha rekordchi hisoblanadi. Uning hisobida 109 ta gol bor.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)