Бразилия терма жамоасининг футболчилари Бразилия футбол конфедерацияси президенти Рожерио Кабокло ва бош мураббий Тите билан Америка Кубогида иштирок этмаслик масаласини муҳокама қилди.
Globo Esporte’нинг хабарига кўра, суҳбат чоршанба куни бўлиб ўтган. Терма жамоанинг фахрий футболчилари мусобақа бўлиб ўтадиган жой Бразилияга кўчганлиги ҳақидаги хабарларни биринчи бўлиб ижтимоий тармоқлардан эшитганидан норози бўлган. Шу билан бирга улар Кубокда иштирок этишдан бош тортиш масаласини ўртага ташлаган.
Америка Кубоги Колумбия ва Аргентинада бўлиб ўтиши кўзда тутилган эди, лекин Колумбиядаги сиёсий вазият, Аргентинадаги коронавирус билан боғлиқ муаммолар туфайли иккала мамлакатда ҳам мусобақа ўтказилмайдиган бўлди. Бразилияда ҳам COVID-19 билан боғлиқ вазият мураккаблигича қолмоқда.
Тите матбуот анжуманида буни тасдиқлади, лекин футболчиларнинг аниқ позициясини гапиришни истамади.
«Бизда аниқ фикрлар бор, биз буни президентга жўнатдик. Бу очиқ суҳбат бўлди. Қатъий позициямиз бор, лекин буни барчага овоза қилишни истамаймиз».
Футболчилардан Эквадорга қарши ўйинга диққатини қаратишини сўрадик. Биз ҳозир яхши ўйин кўрсатишимиз ва ғалаба қозонишимиз зарур.
Мен саволларга жавоб беришдан қочмайман. Америка Кубоги жуда муҳим. Экавадорда қарши бўладиган ўйинга жиддий тайёргарлик кўришимиз лозим. Бизнинг позициямиз аниқ. Сизларни тушунаман, бу позиция сиз учун ҳам муҳим, жавоблардан қочмайман», — дейди мураббий.
Матбуот анжуманида жамоа сардори Каземиро ҳам иштирок этиши кўзда тутилганди. Аммо бразилиялик футболчи журналистлар билан учрашувда қатнашмади.
Америка Кубоги Бразилияда бўлиб ўтиши эълон қилинганидан бери бирорта футболчи ўз фикрини билдирмади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)