Qoraqalpog‘istonning Mo‘ynoq tumanida ikki o‘smir kanalga cho‘kib ketgani haqida xabar berilgandi. Qoraqalpog‘iston prokuraturasi ushbu holat yuzasidan ma’lumot berdi.
Ma’lum qilinishicha, 2021-yil 2-iyun kuni soat 14:00 chamasida Mo‘ynoq tumani Ubbiniyazov ko‘chasida yashovchi aka-ukalar – J.R (2009-yilda tug‘ilgan) va J.D. (2010-yilda tug‘ilgan) shu tumandagi “Madeli” OFYda yashovchi N.Q.ning uyiga mehmonga borib, ushbu qishloqdagi “Qipshaqdaryo” kanaliga cho‘milayotgan vaqtida ehtiyotsizlik oqibatida cho‘kib ketgan.
Shu payt kanal yonidan o‘tib borayotgan qishloq odamlari bolalarni suvdan chiqarib, tuman tibbiyot birlashmasiga olib borgan, lekin tez tibbiy yordam ko‘rsatilishiga qaramasdan ikkala bola ham vafot etgan.
Hozirgi kunda mazkur holat bo‘yicha Mo‘ynoq tumani prokuraturasi tomonidan tergovga qadar tekshirish ishlari olib borilmoqda.
Bundan avval O‘zbekistonda yoz mavsumigacha necha kishi cho‘kish bilan bog‘liq baxtsiz hodisaga uchragani ma’lum qilingani, Qashqadaryoda 14 yoshli bola kanalda cho‘kib ketib, vafot etgani, hamda Katta Farg‘ona kanalining cho‘milish mumkin bo‘lmagan hududida 15 yoshli bola cho‘kib ketgani haqida xabar berilgandi.
Izoh (0)