Қорақалпоғистоннинг Мўйноқ туманида икки ўсмир каналга чўкиб кетгани ҳақида хабар берилганди. Қорақалпоғистон прокуратураси ушбу ҳолат юзасидан маълумот берди.
Маълум қилинишича, 2021 йил 2 июнь куни соат 14:00 чамасида Мўйноқ тумани Уббиниязов кўчасида яшовчи ака-укалар – Ж.Р (2009 йилда туғилган) ва Ж.Д. (2010 йилда туғилган) шу тумандаги «Мадели» ОФЙда яшовчи Н.Қ.нинг уйига меҳмонга бориб, ушбу қишлоқдаги «Қипшақдарё» каналига чўмилаётган вақтида эҳтиётсизлик оқибатида чўкиб кетган.
Шу пайт канал ёнидан ўтиб бораётган қишлоқ одамлари болаларни сувдан чиқариб, туман тиббиёт бирлашмасига олиб борган, лекин тез тиббий ёрдам кўрсатилишига қарамасдан иккала бола ҳам вафот этган.
Ҳозирги кунда мазкур ҳолат бўйича Мўйноқ тумани прокуратураси томонидан терговга қадар текшириш ишлари олиб борилмоқда.
Бундан аввал Ўзбекистонда ёз мавсумигача неча киши чўкиш билан боғлиқ бахтсиз ҳодисага учрагани маълум қилингани, Қашқадарёда 14 ёшли бола каналда чўкиб кетиб, вафот этгани, ҳамда Катта Фарғона каналининг чўмилиш мумкин бўлмаган ҳудудида 15 ёшли бола чўкиб кетгани ҳақида хабар берилганди.
Изоҳ (0)