Қашқадарёда 1 июнь — Халқаро болаларни ҳимоя қилиш куни муносабати билан 200 та мактабгача таълим ташкилоти фаолият бошлади. Бу ҳақда тадбирда иштирок этган «Дарё» мухбири хабар берди.
Таъкидланишича, фаолиятини бошлаган боғчаларнинг 170 таси оилавий боғча бўлса, 1 таси давлат-хусусий шерикчилик ҳамда 29 таси давлат мактабгача таълим ташкилоти ҳисобланади.
«Қарши шаҳрида 11 та, Шаҳрисабз шаҳрида 25 та, Ғузорда 6 та, Деҳқонободда 14 та, Касбида 18 та, Китобда 37 та, Косонда 3 та, Қамашида 2 та, Қарши туманида 4 та, Миришкорда 15 та, Муборакда 5 та, Нишонда 4 та, Чироқчида 23 та, Шаҳрисабз туманида 22 та ва Яккабоғда 11 та боғча иш бошлади. Мазкур боғчалар орқали яна 7537 нафар бола мактабгача таълимга қамраб олинди ва 675 та янги иш ўрини яратилди», — дейди вилоят Мактабгача таълим бошқармаси бошлиғи Асрор Алимардонов.
Маълум қилинишича, вилоятда айни кунда 1697 та мактабгача таълим ташкилоти мавжуд бўлиб, шулардан 401 таси давлат, 40 таси хусусий, 1146 таси оилавий ва 110 таси давлат-хусусий шериклик асосида фаолият юритади ва уларда 128 минг нафар бола тарбияланади.
«Шу ўринда мактабгача таълимда хусусий сектор улуши ошиб бориши, қамровни оширишда ушбу сектор имкониятларидан унумли фойдаланилаётганлиги хусусида ҳам таъкидлаб ўтиш жоиз. Президентимизнинг соҳадаги оқилона сиёсати ҳамда мактабгача таълим вазири Агреппина Шин раҳбарлигида мана шундай ислоҳотлар янада жадаллик касб этмоқда. Хусусан, тадбиркорларга кредит ажратилиши, уларнинг муаммоларини ҳал этиш ва битимларни қисқа муддатда имзоланишида вазирлик жамоасининг хизматлари катта ҳисобланади», — дейди Асрор Алимардонов.
Эслатиб ўтамиз, 31 май куни вилоят ҳокими Зоир Мирзаев Мактабгача таълим бошқармаси фаолияти юзасидан танқидий йиғилиш ўтказгани, унда Мактабгача таълим бошқармаси бошлиғи ва унинг ҳудудий бўлимлари масъуллари ишдан олиниб, яна ўз ўрнида вазифани бажарувчи сифатида иш бошлагани хабар берилганди.
Изоҳ (0)