Qanot Sharq’ning ikkinchi Airbus A320 samolyoti Toshkentga yetib keldi, deb xabar bermoqda in4avia Telegram kanali. Ushbu samolyotning birinchisi 26-aprel kuni olib kelingandi.
Ro‘yxat raqami OE-ILG bo‘lgan bort Amerikaning Air Lease Corporation’dan lizingga olingan va yaqin o‘tmishda Meksikaning Interjet aviakompaniyasi tarkibiga bo‘lgan.
Yangi samolyotlar bilan aviakompaniya hududiy aeroportlardan bir qator xalqaro yo‘nalishlarga parvoz qilishni rejalashtirmoqda.
“Kapital.uz”ning yozishicha, Qanot Sharq matbuot xizmati “ta’sischi mehnat kodeksi talablariga zid ravishda ish haqini to‘lashni atayin xohlamayotgani sababli” o‘z faoliyatini tugatayotganligini ma’lum qildi. Bu haqdagi xabar aviakompaniya rasmiy sahifasida paydo bo‘lgan, biroq bir necha soatdan so‘ng o‘chirib tashlangan (“Kapital”ning qayd etishicha, uning nusxasi tahririyatda bor).
Aviakompaniya matbuot xizmati Qanot Sharq rahbariyati uning matbuot xizmati bo‘linmasini keraksiz, ommaviy axborot vositalari bilan ishlashni esa foydasiz, xarajat qilishga arzimaydi deb hisoblaydi, degan xulosaga kelgan.
Keyinroq aviakompaniya Telegram kanalida matbuot kotibining rahbariyat deb taxmin qilingan shaxs bilan suhbati audiosi paydo bo‘lgan. Unda aytilishicha, Qanot Sharq rahbariyati matbuot xizmati ishini “sinov muddati” deb qaragan, bu vaqt davomida xodimlar ishga olingan hisoblanmaydi va ish haqi olish huquqiga ega emas.
“Kapital.uz” vaziyatga aniqlik kiritish uchun aviakompaniyaning sobiq matbuot kotibi bilan bog‘langan. Uning aytishicha, joylashtirilgan telefon suhbati aviakompaniya muassisi Nosir Abdug‘afforov bilan bo‘lib o‘tgan. Aviakompaniya sobiq matbuot kotibi tomonidan berilgan ma’lumotlarga ko‘ra, Qanot Sharq rahbariyati ishning birinchi oyi hamda keyingi ikki oylik maoshlarini to‘lashdan bosh tortgan.
Shuningdek, sobiq matbuot kotibining so‘zlariga ko‘ra, ishga joylashishda aviakompaniya rahbariyati bilan soliqlar chiqarib tashlanganidan keyin matbuot kotibi lavozimiga 12 million so‘m maosh to‘lash to‘g‘risida shartnoma tuzilgan. Sobiq matbuot kotibining aytishicha, aviakompaniya rahbariyati kelishilgan ish haqiga rozi bo‘lib, uni noma’lum, lekin bir oydan oshmagan sinov muddatiga olgan.
Matbuot kotibi vazifalari qatoriga matbuot anjumani o‘tkazish, press-reliz ishlab chiqish, ijtimoiy tarmoqlarni yuritish, menejment uchun nutqlarni yozish, OAV materiallarini kompilyatsiya qilish, aviakompaniya jurnalini ishlab chiqish va kompaniyaning axborot siyosatini tuzish kiradi. Qanot Sharq’ning sobiq matbuot kotibining ta’kidlashicha, bu juda katta hajmdagi ish va uni bir oy ichida bajarish juda qiyin.
Sobiq matbuot kotibi bergan ma’lumotlarga ko‘ra, yakuniy kelishuv bir oylik sinov muddati va ish haqini to‘lashdan iborat bo‘lgan. Uning ta’kidlashicha, to‘lovlar oldindan kelishilgan miqdordan ko‘p yoki kam bo‘lishi haqida hech qanday gap bo‘lmagan. Shuningdek, sinov muddati xodimning keyingi ishi to‘g‘risida qaror qabul qilish uchun mo‘ljallangani va sinov muddati uchun ish haqi to‘lamasligi haqida gap bo‘lmaganini ham qayd etgan.
Ma’lumot uchun, Qanot Sharq Airlines 1998-yilda ro‘yxatga olingan hamda yuk va yo‘lovchi aviatashuvlariga ixtisoslashgan. 2003-yildan 2012-yilgacha kompaniya “O‘zbekiston havo yo‘llari” MAKdan Il-76 samolyotlarini ijaraga olgan va O‘zbekistondagi birinchi xususiy aviakompaniya sifatida o‘z charter reyslarini amalga oshirgan.
Izoh (0)