Davlat xizmatchilarining mol-mulklari va daromadlarini deklaratsiyalash haqidagi qonun loyihasi tez orada jamoatchilik muhokamasiga chiqariladi. Bu haqda Korrupsiyaga qarshi kurashish agentligi direktori Akmal Burhonov 26-may kungi matbuot anjumanida ma’lum qildi, deb xabar berdi “Gazeta.uz”.
“Davlat xizmatchilarining mol-mulki va daromadlarini deklaratsiya qilish bo‘yicha qonun loyihasi ishlab chiqilgan. Biz buni jamoatchilik muhokamasiga qo‘yishni rejalashtirganmiz. Loyiha xalqaro va xorijiy ekspertlar takliflari asosida ishlab chiqilgan. Qanday bosqichdaligiga kelsak, hozir ushbu qonun qabul qilinganidan keyin samarali va to‘g‘ridan to‘g‘ri ishlashi uchun choralar ko‘rilyapti”, — degan u.
Korrupsiyaga qarshi kurashish agentligi direktori daromadlarni deklaratsiyalash tizimini joriy etish uchun “siyosiy iroda borligini” ta’kidladi.
“Ya’ni tizim yaratish ustida ishlar olib borilyapti. Bu borada ishlar to‘xtamagan. Joriy qilinadi. Siyosiy iroda bor, davlat rahbari tomonidan deklaratsiyalash tizimini tezlashtirish masalasi qo‘yilgan. Bu yerda texnik masalalar turibdi, ya'ni qonun qabul qilinishi bilan tizim ishlab ketishi kerak”, — degan Akmal Burhonov.
Uning so‘zlariga ko‘ra, aynan kim mol-mulki va daromadi deklaratsiya qilishi masalasi muhokama qilinmoqda.
“Masalaning ikkinchi tomoni ham bor — kimlarning mol-mulki va daromadi deklaratsiya qilinadi. Biz xalqaro tajribani ko‘rganimizda (davlat xizmatchisining) faqat o‘zi va turmush o‘rtog‘i, qaysidir davlatlarda farzandlari ham bor. Bizda hozir mentalitetimizdan kelib chiqib, qaynota-qaynonasi, kerak bo‘lsa qaynukasining mol-mulklari va daromadlarini ham deklaratsiya qilish kerak, degan fikrlar tushmoqda”, — degan agentlik rahbari.
Shu bilan birga, mulk daxlsizligi masalasini ham hisobga olish lozimligini ta’kidlagan.
“Halol insonlar ham bor. Masalan, nega halol insonlar nega kuyovi yoki qaynotasi uchun mulkini hammaga ochiqlashi kerak? Shunday masala ham bor. Bu ham ko‘rib chiqilmoqda. O‘ylaymanki, yaqin kunlarda davlat xizmatchilarining mol-mulklari va daromadlarini deklaratsiyalash to‘g‘risidagi qonun loyihasi jamoatchilik muhokamasiga chiqariladi”, — deb ma’lum qilgan u.
Eslatib o‘tamiz, Korrupsiyaga qarshi kurashish agentligi amaldorlarning daromadlari deklaratsiya qilinishini nazarda tutuvchi qonun loyihasini ishlab chiqdi. Ushbu qonun loyihasida mansabdor shaxslarning barchasi daromadlari va xarajatlarini deklaratsiyalash nazarda tutilgan.
Eslatib o‘tamiz, 2019-yilning oktabr oyida 2020-yil 1-yanvardan boshlab O‘zbekistonda davlat xizmatchilari ayrim toifalarining mol-mulkini, daromadlari va xarajatlarini deklaratsiyalash tizimini bosqichma-bosqich joriy etishga qaratilgan Prezident qarori loyihasi jamoatchilik muhokamasiga qo‘yilgandi. Qarorga ko‘ra, davlat xizmatchilarining mol-mulkini, daromadlarini va xarajatlarini deklaratsiyalashning yagona axborot tizimini joriy etish rejalashtirilgan. Shuningdek, Prezidentga ham yil davomida ishlab topgan puli haqida hisobot topshirish majburiyati yuklatilishi mumkin. Qonun loyihasi 2021-yil 25-mart kuni O‘zbekiston Prezidenti Administratsiyasiga kiritildi.
Izoh (0)