Shavkat Mirziyoyev 25-may kuni o‘tkazilgan videoselektor yig‘ilishida issiqlik ta’minoti tizimidagi muammolarga to‘xtalib o‘tdi, deb xabar bermoqda “Gazeta.uz”.
Davlat rahbari uy-joy kommunal xizmat ko‘rsatish vaziri o‘rinbosari v.b. Qurbon Tursunovga issiqlik ta’minoti tizimini modernizatsiya qilishga “mutlaqo yangi yondashuvlarni” joriy etish sharti bilan olti oy sinov muddati berdi.
Prezidentning so‘zlariga ko‘ra, respublika bo‘yicha markazlashgan issiqlik tizimlariga ulangan 15 mingta (40 foiz) turar joydan 2 ming kilometr issiqlik tarmog‘i (50 foiz) yaroqsiz ahvolda, oqibatda tarmoqdagi yo‘qotishlar o‘rtacha 40 foizni tashkil etmoqda.
Shavkat Mirziyoyev Qurbon Tursunov, Toshkent viloyati hokimi Davron Hidoyatov, Farg‘ona viloyati hokimi Xayrullo Bozorov, Namangan viloyati hokimi Shavkat Abdurazzoqov, Buxoro viloyati hokimi Botir Zaripov va Samarqand viloyati hokimi Erkinjon Turdimovga 56 ta qozonxona qurish va rekonstruksiya qilish, 205 kilometr tarmoqlarni ta’mirlash orqali 2 mingdan ortiq ko‘p qavatli uylarni markazlashtirilgan issiqlik ta’minoti tizimiga ulash topshirig‘ini berdi.
Toshkent viloyatida — 1,1 mingta, Farg‘onada — 131 ta, Namanganda — 350 ta, Buxoroda — 202 ta, Samarqandda — 93 ta ko‘p qavatli uy-joylarda markazlashtirilgan issiqlik tizimi tiklanishi kutilmoqda.
“Yangi ko‘p qavatli uylarni, yaxlit massiv shaklida qurishdan maqsad ham, energoresurslarni, infratuzilma xarajatlarini iqtisod qilish hisoblanadi. Lekin bu bo‘yicha vazirlikda ham, hududlarda ham haligacha yagona yondashuv yo‘q”, — degan Shavkat Mirziyoyev.
Mas’ul shaxslar energosamaradorlikni 57 foizdan 92 foizga ko‘tarish, tarmoqdagi yo‘qotishlarni 35 foizdan 3,5 foizga tushirish imkonini beruvchi qozonxonalarni modernizatsiya qilish dasturini tayyorlashi lozim.
“Umuman, uy-joy kommunal xizmat ko‘rsatish vaziri Qurbon Tursunov joriy yilning o‘zida 183 ta mavzeda qurilayotgan 40 mingta xonadonni markazlashtirilgan isitish tizimiga o‘tkazishni o‘ylashi zarur”, — degan Shavkat Mirziyoyev.
Prezident topshirig‘i bilan bosh vazir birinchi o‘rinbosari Ochilboy Ramatov, bosh vazir o‘rinbosari Jamshid Qo‘chqorov, uy-joy va kommunal xizmat ko‘rsatish vaziri Sherzod Hidoyatov va moliya vaziri Timur Ishmetov bir oy muddatda turar joylarning markazlashgan issiqlik ta’minotini tiklash, ularni zamonaviy tizimlarga o‘tkazish, bunga xususiy sektorni keng jalb qilish bo‘yicha taklif kiritishi lozim.
Hisob-kitoblarga ko‘ra, Toshkent shahri issiqlik ta’minotini “yopiq tizim”ga o‘tkazish yiliga 3 million gigakaloriya issiqlik yo‘qotishni (420 milliard so‘m), 320 million kubmetr (210 milliard so‘m) tabiiy gaz hamda 85 million kilovatt (40 milliard so‘m) elektr sarfini qisqartirish imkonini beradi. Bundan ko‘rsatkichlar 2019-yilning oktabrida ham aytilgan.
Prezident 2019-yilning oktabrida Toshkentni issiqlik ta’minotini yopiq tizimga o‘tkazish (issiq suv yetkazib berish vaqti 10−20 soniyagacha tezlashishi kerak), boshqa shaharlarda issiqlik ta’minotini tiklash va barcha xususiy uylarni issiqlik bilan ta’minlash bo‘yicha chora-tadbirlarni ishlab chiqish bo‘yicha ko‘rsatmalar bergan edi.
2020-yil yanvar oyida Janubiy Koreyaning CM Entech kompaniyasi Toshkent shahrida issiqlik ta’minoti tizimini modernizatsiya qilish, xususan, Mirzo Ulug‘bek tumanining 2-issiqlik markazi rekonstruksiyasi loyihalarini taklif qilgan edi. Loyiha qiymati 70-100 million dollarga baholangan.
Izoh (0)