Кевин де Брюйне жароҳати ҳақида маълумот берди. У Евро—2020 ни ўтказиб юбориши мумкин

«Манчестер Сити» ярим ҳимоячиси Кевин де Брюйне Чемпионлар Лигаси финали доирасида «Челси»га қарши ўйинда (0:1) олган жароҳати ҳақида маълумот берди.

«Менга бурун суяклари ва чап кўз деворчасининг синиши ташхиси қўйилди. Ҳозир ўзимни яхши ҳис қиляпман.

Албатта, кечаги воқеадан ҳафсалам пир бўлган. Биз қайтамиз», — деб ёзади бельгиялик футболчи Twitter саҳифасида.

Бельгиялик футболчи учрашувнинг 56-дақиқасида лондонликлар ҳимоячиси Антонио Рюдигер билан тўқнашиб кетди. Шундан сўнг унга узоқ вақт давомида тиббий ёрдам кўрсатилганига қарамай, якунда майдонни эрта тарк этишга мажбур бўлди.

ESPN нашри хабарига кўра кўз деворчаси суякларининг ўз ҳолига қайтиши учун камида уч ҳафта вақт кетади, бу эса футболчининг Европа чемпионатида қатнашишини сўроқ остида қолдиради. Шунингдек, де Брюйненинг мусобақада ҳимоя ниқобида ҳаракат қилиши мумкинлиги ҳам қўшимча қилинган.

Эслатиб ўтамиз, Евро—2020 мусобақаси 11 июндан 11 июлгача бўлган муддатда бўлиб ўтади.