Тошкентда ўз ўғлини уриб ўлдириб қўйган болалар ва ўсмирлар спорт мактабида спорт мураббийи бўлиб ишловчи 29 ёшли эркакка суд ҳукми ўқилди. Бу ҳақда UzNews хабар бермоқда.
Жиноят ишлари бўйича Учтепа туман судининг ҳукмига кўра, 29 ёшли М.А.га нисбатан Жиноят кодексининг 104-моддаси 3-қисми «д» банди (қасддан баданга оғир шикаст етказиш жабрланувчининг ўлишига сабаб бўлиши) билан 9 йил муддатга озодликдан маҳрум қилиш жазоси тайинланган.
Маълум бўлишича, М.А. ўз уйида 5 ёшли ўғли водопровод «шланка»сидан совуқ сув ичганини кўриб, унинг кўкрак қафасига муштлари билан зарба берган. Сўнг хонадон ошхонасига олиб кириб, косаларга сузилган овқатларни еб қўйганини кўриб, қорин қисмига мушти билан уриб, қасддан оғир тан жароҳати етказган.
Оқибатда бола кўрсатилган тиббий муолажаларга қарамасдан олган тан жароҳатларидан Мирзо Улуғбек туманида жойлашган 2-сонли болалар жарроҳлик шифохонасининг жонлантириш бўлимида вафот этган.
25 май куни Тошкент шаҳар суди жиноят ишлари бўйича судлов ҳайъати апелляция инстанциясида кўриб чиқилган М.А.га нисбатан 20 апрелда чиқарилган ҳукми ўзгаришсиз қолдирилиб, 9 йил муддатга озодликдан маҳрум қилинган ва жазони умумий тартибли колонияда ўташи белгиланган.
Изоҳ (0)