Surxondaryoda Termiz tumani sudi raisi xizmat xonasiga bostirib kirib, sud majlisida ishtirok etish va jarayonni tasvirga olishni talab qilgan “Effect.uz” sayti xodimlari ishi yuzasidan sud ishlari boshlandi, deya xabar bermoqda Oliy sud axborot xizmati.
Qashqadaryo viloyat sudida sudlanuvchilar H.A. (1987-yilda Farg‘ona viloyatida tug‘ilgan, “Effect.uz” veb-sayti muxbiri), A.N. (1982-yilda Navoiy viloyatida tug‘ilgan, “Effect.uz” veb-sayti muxbiri) va E.T. (1990- yilda Farg‘ona viloyatida tug‘ilgan, “Effect.uz” veb-sayti muxbiri)ga nisbatan jinoyat ishini ko‘rib chiqish bo‘yicha ochiq sud o‘tkazildi.
Ushbu jinoyat ishi Qashqadaryo viloyat sudi sudyasi N. Abdullayev raisligida ko‘rildi.
Sudlanuvchilar H.A. Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va 236-moddasi (tergov qilishga yoki sud ishlarini hal etishga aralashish), A.N. Jinoyat kodeksining 139-moddasi (tuhmat), 140-moddasi (haqorat qilish), 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va 236-moddasi (tergov qilishga yoki sud ishlarini hal etishga aralashish) va E.T. Jinoyat kodeksining 139-moddasi (tuhmat), 140-moddasi (haqorat qilish), 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va 236-moddasi (tergov qilishga yoki sud ishlarini hal etishga aralashish) da nazarda tutilgan jinoyatlarni sodir etganlikda ayblanmoqda.
Sud jarayoni davom etmoqda. Keyingi sud majlisi 31-may kuni o‘tkazilishi belgilandi.
Eslatib o‘tamiz, 6-aprel kuni “Effect.uz” axborot agentligining 2 nafar muxbiriga nisbatan Jinoyat kodeksining 219 va 236-moddalari bilan sirtdan ayb e’lon qilinib, sudning ajrimi bilan qamoqqa olish ehtiyot chorasi qo‘llanilgan va ularga nisbatan qidiruv e’lon qilingandi.
Bunga 2021-yilning yanvar oyida “Effect.uz” nashrining xodimlari jinoyat ishlari bo‘yicha Termiz tuman sudi raisi xizmat xonasiga bostirib kirib, sud majlisida ishtirok etish va jarayonni tasvirga olishni talab qilgani tasvirlangan videoyozuv tarqalgani sabab bo‘lgan. Videoyozuvda qayd etilgan holatga huquqiy baho berish maqsadida Sudyalar oliy kengashi raisi tomonidan bosh prokuror nomiga taqdimnoma kiritilgan.
Izoh (0)