Samarqand viloyatining Payariq tumanida yerni noqonuniy sotmoqchi bo‘lgan fermer xo‘jaligi rahbariga jinoyat ishi qo‘zg‘atildi.
DXX matbuot xizmatining “Daryo”ga ma’lum qilishicha, fermer xo‘jaligi rahbari mazkur xo‘jalikning sug‘oriladigan 1 gektar yer maydonini parrandachilik bilan shug‘ullanmoqchi bo‘lgan fuqaroga 15 ming dollarga sotishga kelishgan va hokimiyat tizimidagi tanishlari orqali uning nomiga rasmiylashtirib berishni va’da qilgan.
Fermer xo‘jaligi rahbari so‘ralgan puldan avans sifatida 4 ming dollar olgan vaqtida DXX Samarqand viloyati boshqarmasi va departamentning hududiy boshqarmasi xodimlari tomonidan qo‘lga olingan.
Hozirda ushbu shaxsga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Samarqandning Oqdaryo tumanida 50 ming dollar va Nexia-3 evaziga 1 gektar yer olib bermoqchi bo‘lgan fermer xo‘jaligi rahbari ushlangani, Samarqand tumanida 3 gektar yaylov yerni 30 ming dollarga noqonuniy sotmoqchi bo‘lgan ikki kishi qo‘lga tushgani, Urgut va Bulung‘ur tumanlarida yer sotish bilan bog‘liq firibgarlik holatlari aniqlangani haqida xabar berilgan edi.
Izoh (0)