Dunyodagi eng yirik onlayn savdo platformasi — Amerikaning Amazon kompaniyasi Markaziy Osiyodan, shu jumladan, O‘zbekistondan bo‘lgan sotuvchilarga o‘z tovarlarini saytda ro‘yxatdan o‘tkazishga ruxsat berdi. “Gazeta.uz”ning yozishicha, bu haqda saytda e’lon qilingan davlatlarning yangilangan ro‘yxati guvohlik bermoqda.
24-may holatiga ko‘ra, O‘zbekiston, Qozog‘iston, Qirg‘iziston, Tojikiston va Turkmaniston savdogarlari va ishlab chiqaruvchilari Amazon’da to‘g‘ridan to‘g‘ri ro‘yxatdan o‘tishlari mumkin.
Qozog‘iston savdo va integratsiyalashuv vaziri Baxit Sultanovning ma’lum qilishicha, Amazon bilan 2020-yil noyabr oyidan buyon olib borilgan muzokaralardan so‘ng mamlakat dunyodagi elektron tijorat platformalaridan birida “ruxsat berilgan” davlatlar ro‘yxatiga kiritilgan.
Shuningdek, ular Markaziy Osiyodagi boshqa qo‘shni davlatlarni, jumladan, O‘zbekistonni ham qo‘shishni so‘rab, bunga erishgan. Baxit Sultanovning ta’kidlashicha, bu mintaqada umumiy biznes muhitining rivojlanishiga yordam beradi.
Uning so‘zlariga ko‘ra, qozog‘istonlik biznesmenlar uchun Amazon’ga kirishning asosiy muammosi ruxsat berilgan mamlakatlar “qatoridan o‘rin olish” zarurati, ya’ni ushbu mamlakatlarda Amazon’dagi barcha operatsiyalarni amalga oshirish uchun yuridik shaxs va bank hisob raqamini ochish edi.
“Ammo endi biz bu qiyinchiliklarni bartaraf etdik. Qozog‘istonlik tadbirkorlar to‘g‘ridan to‘g‘ri Qozog‘iston banklaridan to‘lovni olishlari va o‘z bayroqlari ostida savdo qilishlari mumkin”, — degan vazir.
Baxit Sultanovning qayd etishicha, Amazon kichik va o‘rta biznesga yo‘l ochadi — elektron tijorat platformasidagi barcha chakana savdolarning 60 foizini 1,9 million kichik va o‘rta korxonalar amalga oshiradi.
Izoh (0)