Дунёдаги энг йирик онлайн савдо платформаси — Американинг Amazon компанияси Марказий Осиёдан, шу жумладан, Ўзбекистондан бўлган сотувчиларга ўз товарларини сайтда рўйхатдан ўтказишга рухсат берди. «Gazeta.uz»нинг ёзишича, бу ҳақда сайтда эълон қилинган давлатларнинг янгиланган рўйхати гувоҳлик бермоқда.
24 май ҳолатига кўра, Ўзбекистон, Қозоғистон, Қирғизистон, Тожикистон ва Туркманистон савдогарлари ва ишлаб чиқарувчилари Amazon’да тўғридан-тўғри рўйхатдан ўтишлари мумкин.
Қозоғистон савдо ва интеграциялашув вазири Бахит Султановнинг маълум қилишича, Amazon билан 2020 йил ноябрь ойидан буён олиб борилган музокаралардан сўнг мамлакат дунёдаги электрон тижорат платформаларидан бирида «рухсат берилган» давлатлар рўйхатига киритилган.
Шунингдек, улар Марказий Осиёдаги бошқа қўшни давлатларни, жумладан, Ўзбекистонни ҳам қўшишни сўраб, бунга эришган. Бахит Султановнинг таъкидлашича, бу минтақада умумий бизнес муҳитининг ривожланишига ёрдам беради.
Унинг сўзларига кўра, қозоғистонлик бизнесменлар учун Amazon’га киришнинг асосий муаммоси рухсат берилган мамлакатлар «қаторидан ўрин олиш» зарурати, яъни ушбу мамлакатларда Amazon’даги барча операцияларни амалга ошириш учун юридик шахс ва банк ҳисоб рақамини очиш эди.
«Аммо энди биз бу қийинчиликларни бартараф этдик. Қозоғистонлик тадбиркорлар тўғридан-тўғри Қозоғистон банкларидан тўловни олишлари ва ўз байроқлари остида савдо қилишлари мумкин», — деган вазир.
Бахит Султановнинг қайд этишича, Amazon кичик ва ўрта бизнесга йўл очади — электрон тижорат платформасидаги барча чакана савдоларнинг 60 фоизини 1,9 миллион кичик ва ўрта корхоналар амалга оширади.
Изоҳ (0)