Chilonzorda go‘sht ichiga giyohvand modda joylashtirib olib ketayotgan shaxs ushlandi

Toshkent shahri Chilonzor tumanida go‘sht ichiga giyohvand modda joylashtirgan fuqaro aniqlandi, deya xabar bermoqda Davlat bojxona qo‘mitasi.

Qayd etilishicha, Toshkent shahar bojxona boshqarmasi Kontrabandaga qarshi kurashish va bojxona auditi bo‘limi xodimlari O‘zbekiston Davlat xavfsizlik xizmati xodimlari bilan hamkorlikda poytaxtining Chilonzor tumanida o‘tkazgan navbatdagi tezkor tadbirlari davomida oldindan kuzatuvda bo‘lgan fuqaro boshqaruvidagi Nexia-2 rusumli transport vositasi belgilangan tartibda ko‘zdan kechirildi.

Ko‘zdan kechirish natijasida transport vositasining orqa yukxonasida polietilen paketga o‘ralgan go‘sht mahsuloti ichiga yashirib qo‘yilgan jigarrang, o‘tkir hidli mumsimon modda borligi aniqlandi.

O‘tkazilgan ekspertiza tekshiruvlari natijasida mazkur modda 108 gramm og‘irlikdagi opiy giyohvandlik vositasi ekanligi ma’lum bo‘ldi.

Hozirda mazkur holat yuzasidan tergovga qadar tekshiruv harakatlari olib borilmoqda.

Bundan avval  Toshkentda kuchli ta’sir qiluvchi dori vositalari savdosi bilan shug‘ullangan jinoiy guruh qo‘lga olingani, Jizzaxda bojxonachilar tomonidan to‘xtatilgan Epica’dan gashish, Samarqandda avtomobil shinasi ichidan opiy topilgani hamda Namanganda umumiy qiymati 2 mlrd so‘mlik dori vositalarini mamlakat hududiga olib kirgan shaxslar ushlangani haqida xabar berilgandi.