Тошкент шаҳри Чилонзор туманида гўшт ичига гиёҳванд модда жойлаштирган фуқаро аниқланди, дея хабар бермоқда Давлат божхона қўмитаси.
Қайд этилишича, Тошкент шаҳар божхона бошқармаси Контрабандага қарши курашиш ва божхона аудити бўлими ходимлари Ўзбекистон Давлат хавфсизлик хизмати ходимлари билан ҳамкорликда пойтахтининг Чилонзор туманида ўтказган навбатдаги тезкор тадбирлари давомида олдиндан кузатувда бўлган фуқаро бошқарувидаги Nexia-2 русумли транспорт воситаси белгиланган тартибда кўздан кечирилди.
Кўздан кечириш натижасида транспорт воситасининг орқа юкхонасида полиэтилен пакетга ўралган гўшт маҳсулоти ичига яшириб қўйилган жигарранг, ўткир ҳидли мумсимон модда борлиги аниқланди.
Ўтказилган экспертиза текширувлари натижасида мазкур модда 108 грамм оғирликдаги опий гиёҳвандлик воситаси эканлиги маълум бўлди.
Ҳозирда мазкур ҳолат юзасидан терговга қадар текширув ҳаракатлари олиб борилмоқда.
Бундан аввал Тошкентда кучли таъсир қилувчи дори воситалари савдоси билан шуғулланган жиноий гуруҳ қўлга олингани, Жиззахда божхоначилар томонидан тўхтатилган Epica’дан гашиш, Самарқандда автомобиль шинаси ичидан опий топилгани ҳамда Наманганда умумий қиймати 2 млрд сўмлик дори воситаларини мамлакат ҳудудига олиб кирган шахслар ушлангани ҳақида хабар берилганди.
Изоҳ (0)