Xalq deputatlari Andijon shahar kengashining 17-may kuni o‘tkazilgan navbatdagi sessiyasida deputat Shuhrat Karimov daxlsizlik huquqidan mahrum qilingandi. Andijon viloyati deputatlari ushbu ish yuzasidan o‘z e’tirozlarini bildirib, Prezidentga murojaat qildi. Senat deputatlarning ushbu murojaatiga munosabat bildirdi.
Senat mazkur holat Mahalliy hokimiyat vakillik organlari faoliyatiga ko‘maklashuvchi komissiya (maxsus komissiya) tomonidan nazoratga olinib, o‘rganish ishlari olib borilayotganini eslatib o‘tgan.
“Ta’kidlash joizki, ijtimoiy tarmoqlarda e’lon qilingan har bir masalani puxta va sinchkovlik bilan qonunchilikka tayangan holda o‘rganish talab etiladi. Shu bois masalaga huquqiy yechim topish va adolatli qaror chiqarish maqsadida ayni paytda maxsus komissiya tomonidan o‘rganish ishlari davom ettirilmoqda. Tez kunlarda ushbu o‘rganish natijalari yuzasidan jamoatchilikka batafsil ma’lumot beriladi”, — deyiladi Senat munosabatida.
Shuningdek, murojaatda keltirib o‘tilgan vajlar o‘z tasdig‘ini topgan taqdirda, qonunchilikka zid ravishda qabul qilingan qaror Senat tomonidan o‘rnatilgan tartibda bekor qilinishi ta’minlanishi ta’kidlangan.
Eslatib o‘tamiz, prokuror taqdimnomasiga ko‘ra daxlsizligidan mahrum bo‘lgan deputat Shuhrat Karimov Andijonda yer sotuvchilarning kirdikorlarini fosh qilib yurgan. Korrupsiyaga qarshi kurashish agentligi prokurorning bunday harakatini “oqlab bo‘lmasligi”ni ma’lum qilib, prokuror korrupsiya holati haqida xabar bergan shaxsni himoya qilishi kerakligini ta’kidlagandi.
Keyinchalik deputat hokimlik va prokuratura bosim o‘tkazayotganini, Andijon shahar hokimi esa sessiyadagi holat deputatning obro‘sini saqlash maqsadida qilinganini bildirdi. Bosh prokuratura esa daxlsizlik huquqi bekor qilingan andijonlik deputat nimada ayblanayotganini ma’lum qildi.
Izoh (0)