Minskda Ryanair samolyotining majburiy qo‘ndirilishi bilan bog‘liq voqealardan so‘ng ko‘pchilik aviakompaniyalar Belarus havo hududini chetlab o‘tishni boshlagani haqida xabar berilgan edi.
Spot’ning yozishicha, Latviyaning AirBaltic kompaniyasi o‘zining samolyotlari uchun Belarus havo hududidan foydalanishni bekor qilgani haqida e’lon qilgan birinchi kompaniya bo‘ldi. Austrian Airlines ham Belarusni aylanib o‘tib uchishni boshladi.
Vengriyaning WizzAir aviakompaniyasi o‘z samolyotlari Belarus havo hududiga kirmasligini ma’lum qildi. Kiprda ro‘yxatdan o‘tgan Avia Solutions kompaniyasi Litvadagi samolyotlari Belarus hududi bo‘ylab uchib o‘tmasligini va’da qildi.
Bundan tashqari, turli mamlakatlar hukumatlari Belarusning Belavia aviakompaniyasiga o‘z mamlakatlari hududiga kirishni taqiqlashni boshladi. Fransiya, Buyuk Britaniya, Ukraina shunday yo‘l tutdi. Boshqa mamlakatlar ham ular qatoriga qo‘shilish arafasida.
O‘zbekistonga ta’siri
Belavia Toshkent va Minsk o‘rtasida haftasida ikki marta qatnaydi. Aviaparvozlar cheklangan paytda ushbu reysdan Yevropa yoki AQShga borish uchun tutashtiruvchi reys sifatidan foydalanish mumkin.
Aviasales saytida Toshkentdan Minskga qo‘nib o‘tish bilan dunyoning turli nuqtalariga bir necha o‘nlab reyslar mavjud. Masalan, Belavia orqali Minskka va u yerdan Lufthansa’da Berlinga uchish mumkin edi. Biroq Lufthansa Belarus havo hududidagi faoliyatini vaqtincha to‘xtatdi.
Ikkinchi ta’sir etuvchi kanal — Qozog‘iston. O‘zbekistonliklar aksar hollarda Olmaota yoki Nursultonga borib, u yerdan boshqa mamlakatlarga uchadi. Biroq bu holatda ham parvoz vaqti yoki uzayadi yoki reys umuman bo‘lmaydi.
Forbes ma’lumotlariga ko‘ra, 23-may kuni Olmaotadan Frankfurtga yo‘l olgan Lufthansa hali Belarus hududidan o‘tgan. Ushbu reys davomiyligi 6 soat 31 daqiqani tashkil etgan.
Biroq 25-mayga kelib ushbu laynerning ayni shu reysi Belarusni chetlab o‘tgan va parvoz vaqti 7 soat 1 daqiqani tashkil etgan, ya’ni 35 daqiqaga uzaygan.
Nashrning yozishicha, havo navigatsiyasi xarajatlarini hisobga olmaganda, parvoz davomiyligining oshishi aviayoqilg‘i narxining oshishiga olib keladi. Bu esa o‘z navbatida aviachiptalar narxiga ta’sir qilishi mumkin.
Boshqa tomondan, xabar e’lon qilingan paytda Uzbekistan Airways kabi Rossiya aviakompaniyalari Belarus hududidan o‘tishda davom etmoqda. Bu boykotning o‘zbekistonlik yo‘lovchilarning safariga ta’sirini sezilarli darajada kamaytiradi.
Izoh (0)