Беларусь ҳаво ҳудудига бойкот Ўзбекистондан амалга ошириладиган парвозларга қандай таъсир кўрсатиши мумкин?

Минскда Ryanair самолётининг мажбурий қўндирилиши билан боғлиқ воқеалардан сўнг кўпчилик авиакомпаниялар Беларусь ҳаво ҳудудини четлаб ўтишни бошлагани ҳақида хабар берилган эди.

Spot’нинг ёзишича, Латвиянинг AirBaltic компанияси ўзининг самолётлари учун Беларусь ҳаво ҳудудидан фойдаланишни бекор қилгани ҳақида эълон қилган биринчи компания бўлди. Austrian Airlines ҳам Беларусни айланиб ўтиб учишни бошлади.

Венгриянинг WizzAir авиакомпанияси ўз самолётлари Беларусь ҳаво ҳудудига кирмаслигини маълум қилди. Кипрда рўйхатдан ўтган Avia Solutions компанияси Литвадаги самолётлари Беларусь ҳудуди бўйлаб учиб ўтмаслигини ваъда қилди.

Бундан ташқари, турли мамлакатлар ҳукуматлари Беларуснинг Belavia авиакомпаниясига ўз мамлакатлари ҳудудига киришни тақиқлашни бошлади. Франция, Буюк Британия, Украина шундай йўл тутди. Бошқа мамлакатлар ҳам улар қаторига қўшилиш арафасида.

Ўзбекистонга таъсири

Belavia Тошкент ва Минск ўртасида ҳафтасида икки марта қатнайди. Авиапарвозлар чекланган пайтда ушбу рейсдан Европа ёки АҚШга бориш учун туташтирувчи рейс сифатидан фойдаланиш мумкин.

Aviasales сайтида Тошкентдан Минскга қўниб ўтиш билан дунёнинг турли нуқталарига бир неча ўнлаб рейслар мавжуд. Масалан, Belavia орқали Минскка ва у ердан Lufthansa’да Берлинга учиш мумкин эди. Бироқ Lufthansa Беларусь ҳаво ҳудудидаги фаолиятини вақтинча тўхтатди.

Иккинчи таъсир этувчи канал — Қозоғистон. Ўзбекистонликлар аксар ҳолларда Олмаота ёки Нурсултонга бориб, у ердан бошқа мамлакатларга учади. Бироқ бу ҳолатда ҳам парвоз вақти ёки узаяди ёки рейс умуман бўлмайди.

Forbes маълумотларига кўра, 23 май куни Олмаотадан Франкфуртга йўл олган Lufthansa ҳали Беларусь ҳудудидан ўтган. Ушбу рейс давомийлиги 6 соат 31 дақиқани ташкил этган.

Бироқ 25 майга келиб ушбу лайнернинг айни шу рейси Беларусни четлаб ўтган ва парвоз вақти 7 соат 1 дақиқани ташкил этган, яъни 35 дақиқага узайган.

Нашрнинг ёзишича, ҳаво навигацияси харажатларини ҳисобга олмаганда, парвоз давомийлигининг ошиши авиаёқилғи нархининг ошишига олиб келади. Бу эса ўз навбатида авиачипталар нархига таъсир қилиши мумкин.

Бошқа томондан, хабар эълон қилинган пайтда Uzbekistan Airways каби Россия авиакомпаниялари Беларусь ҳудудидан ўтишда давом этмоқда. Бу бойкотнинг ўзбекистонлик йўловчиларнинг сафарига таъсирини сезиларли даражада камайтиради.