Eriell Group O‘zbekiston Respublikasi Energetika vazirligi tomonidan O‘zbekiston energetika, neft-gaz va geologiya sohalari xodimlari kasaba uyushmasi respublika kengashi hamkorligida, iqtidorli va ijtimoiy faol yoshlarni aniqlash maqsadida tashkil etilgan yoqilg‘i-energetika kompleksi (YoEK)ning birinchi xalqaro yoshlar forumida ishtirok etdi.
Forumda Eriell Group’ning yosh mutaxassislari ittifoqi vakillari va xodimlari ishtirok etib, ular kompaniyalar guruhi faoliyatiga doir ma’ruzalar bilan chiqish qildi. Burg‘ilash sohasidagi yuqori texnologik xizmatlarni ko‘rsatishga zamonaviy yondashuvlar xususida so‘zlab berildi, ular yurtimizda eng murakkab loyihalarni amalga oshirish bo‘yicha tajribalari bilan o‘rtoqlashishdi.
Forumda Eriell Group stendi taqdimoti bo‘lib o‘tdi. Unda ishtirokchilar o‘zaro tajriba va g‘oyalar almashishdi, qiziqtirgan savollariga javob olishdi. Muloqot chog‘ida yosh mutaxassislar va talabalar YoEK sohasining bo‘lajak mutaxassislari va bu sohada faoliyat yuritayotgan yoshlar o‘rtasida yaqin aloqalar o‘rnatishga qaratilgan qator taklif va tashabbuslarni ilgari surdi.
“Forum ishtirokchilarga yetakchi kompaniyalar faoliyati, YoEK ishlab chiqarish faoliyatining to‘liq tuzilmasi, turli sanoat tarmoqlari texnologik jarayonlaridagi yutuqlar va innovatsiyalar bilan tanishish imkoniyatini taqdim etdi. Unda yosh mutaxassislar ishtirok etgani tarmoqlararo hamkorlik to‘g‘risida umumiy tushunchaga ega bo‘lish va uning muhimligini anglab yetishga zamin yaratdi. Treninglar, jamoaviy o‘yinlar va ko‘ngilochar tadbirlar ham ko‘tarinki kayfiyatda o‘tganini alohida ta’kidlab o‘tmoqchiman. Bu tarmoqlarning bo‘lajak rahbarlariga jamoa bilan ishlash va o‘zaro sheriklikning muhim jihatlarini anglab yetishga imkon yaratadi. Forum yosh mutaxassislarga yetakchilik qobiliyatini sinovdan o‘tkazish, sheriklar oldida o‘z kompaniyasini taqdim etish va notiqlik san’atining naqadar muhim ekanini anglab yetish imkoniyatini taqdim etdi. Ishonchim komilki, forum mazkur sohadagi yoshlarning kelgusidagi faoliyatiga ijobiy ta’sir ko‘rsatadi. Shu o‘rinda tashkilotchilar, ustoz va murabbiylarga minnatdorchilik bildirmoqchiman!”, – deydi Eriell Group loyihasi rahbari E. Do‘stmuhamedov.
“Bunday keng ko‘lamli forumda ilk bor ishtirok etmoqdamiz. Boshqa kompaniyalarning yosh mutaxassislari bilan uchrashish va muloqot qilish juda qiziqarli bo‘ldi. Barchamiz tajriba orttirdik, yorqin taassurotlarga ega bo‘ldik. Bu nafaqat professional jihatdan foydali, balki ko‘tarinki kayfiyat ham baxsh etadi. Ishonch bilan aytishim mumkinki, keyingi forumda ham bajonidil ishtirok etaman”, – deya o‘z taassurotlari bilan o‘rtoqlashdi Eriell Group’ning burg‘ilash qorishmalari bo‘yicha yosh muhandisi R.Mannonov.
“Forum yuksak saviyada o‘tdi. Zerikishga vaqt bo‘lmadi, u 5 kun davomida ketma-ket o‘tkazilgan turli treninglar, tanlovlar, musobaqalarga boy bo‘ldi. Yangi do‘stlar orttirdik, eski aloqalarni mustahkamladik. Ustoz-murabbiylar o‘gitidan bahramand bo‘ldik, energetika tarmog‘ining yosh vakillari bilan o‘z tajribamizni bo‘lishdik. Keyingi forumni intizorlik bilan kutib qolamiz!”, – dedi Eriell Group qiya yo‘naltirilgan quduqlarni loyihalash bo‘yicha mutaxassisi A. Yo‘ldoshev.
Eriell Group O‘zbekistonning qazib olish sanoatida muvaffaqiyatli faoliyat yuritib kelayotgan, yirik mustaqil servis kompaniyalar guruhlaridan biri hisoblanadi. Neft servisining zamonaviy texnologiyalaridan foydalanish, xodimlarning yuksak professionalizm darajasi guruhning tarmoqdagi eng yetakchi kompaniyalardan biri maqomini ushlab turishini ta’minlamoqda.
Forumda jami 500 dan ortiq kishi, jumladan YoEK sohasi o‘quv muassasalarida tahsil olayotgan talabalar ishtirok etdi. Ishtirokchilar yoshlarda yagona korporativ madaniyatni shakllashtirish, professional, texnik, korporativ va boshqaruv ko‘nikmalarini rivojlantirish, shuningdek, yosh mutaxassislarni innovatsion, tadqiqot va loyiha faoliyatiga jalb qilish masalalarini muhokama qilishdi.
Eriell Group matbuot xizmati
Izoh (0)