Самарқанднинг Оқдарё туманида 50 минг доллар ва Nexia-3 эвазига 1 гектар ер олиб бермоқчи бўлган фермер хўжалиги раҳбари ушланди. Бу ҳақда «Дарё»га ДХХ матбуот хизмати хабар берди.
Маълум бўлишича, Самарқанд вилояти Оқдарё туманидаги фермер хўжалиги раиси туман ҳокимлигида бош мутахассис лавозимида ишловчи қариндоши билан ўзаро келишган ҳолда, ўзи раҳбарлик қилаётган фермер хўжалигига қарашли суғориладиган 1 гектар ер майдонини ҳокимлик захирасига қайтариб, сўнгра уни иссиқхона ташкил қилмоқчи бўлган Самарқанд шаҳрида яшовчи фуқаро номига расмийлаштириб беришни ваъда қилган. Эвазига ундан 50 минг доллар ва Nexia-3 автомашинаси талаб қилган.
ДХХ Самарқанд вилояти бошқармаси ходимларининг вилоят прокуратураси ҳамда ички ишлар бошқармаси билан ҳамкорликда ўтказган тезкор тадбирида ушбу шахслар сўралган пулни олган вақтларида ашёвий далиллар билан ушланган.
Ҳозирда ҳолат юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ Самарқанд вилоятининг Ургут ва Булунғур туманида ер сотиш билан боғлиқ фирибгарлик ҳолатлари аниқлангани ҳақида хабар берилган эди. Ургутда фуқаро Ж.М. танишига қарашли «Р» фермер хўжалигининг 15 сотих ер майдонини бошқа фуқарога ажратиб бериш эвазига фирибгарлик йўли билан 10 минг долларни олган вақтида ушланганди. Булунғурда Т.М. фуқаро С.нинг ишончига кириб, унга «М» фермер хўжалигига қарашли ер майдонидан 25 сотихини 35 миллион сўм эвазига танишлари орқали олиб беришга ваъда бериб, олдиндан 10 миллион сўмни фирибгарлик йўли билан олган вақтида қўлга тушганди.
Бундан аввал Навоийда ўзганинг ер майдонини 47 миллион сўмга сотиб юбормоқчи бўлган шахс қўлга тушгани, Андижонда 6 гектар ерни 18 минг долларга сотмоқчи бўлган фермер хўжалиги раҳбарига жиноят иши қўзғатилгани, Тўрткўлда фуқарога 30 миллион сўмга 10 гектар ер олиб беришни ваъда қилган шахс ушлангани ҳамда Тошкент вилоятида қарийб 160 гектар ер ноқонуний ўзлаштириб олингани ҳақида хабар берилганди.
Изоҳ (0)