“Bu lavozimlarni o‘zim talab qilib olganim yo‘q” — Aziz Abduhakimov egallab turgan lavozimlari haqida gapirdi

Bosh vazir o‘rinbosari, turizm va sport vaziri Aziz Abduhakimov 25-may, seshanba kuni “Toshkent 5 tashabbus harakati” yoshlar festivali doirasida o‘tkazilgan uchrashuvda bir shaxsning bir necha lavozimlarda ishlashi qanchalik to‘g‘ri ekani haqidagi savolga javob qaytardi. Bu haqda “Daryo” muxbiri xabar bermoqda.

“Men o‘zimcha borib, bu lavozimlarni talab qilib olganim yo‘q. Bir yo‘nalishda o‘sish, uni ijro etish osonroq bo‘ladi. E’tibor bersangiz, har bir lavozim mantiqiy nuqtayi nazardan bog‘langan. Ya’ni barchasi turizmga oid. Baribir ham bu vazifalarni bajarar edim.

Alohida aytishim kerakki, ko‘pchilikni yana bitta narsa qiziqtiradi. Shuncha joyda ishlab turib, hammasidan oylik oladimi, qayerga ishlatadi, degan savollar bo‘lishi, shubhasiz. Men faqat bosh vazir o‘rinbosari sifatida oylik olaman.

Mening o‘ylashimcha, albatta, vaqti-soati keladi, ularning hammasi o‘z egasini topadi. Yoshlarimiz tezroq o‘zini ko‘rsatamiz desa, rahbariyat, albatta, lozim topsa, yoshlarimizni shu lavozimlarga qo‘yishadi, loyiq topishadi”, — dedi Abduhakimov.