Yoshlar ishlari agentligi direktori Alisher Sa’dullayev 25-may, seshanba kuni “Toshkent 5 tashabbus harakati” yoshlar festivali doirasida jurnalistlarga bergan intervyusida yoshlarga ajratilayotgan imtiyozli kreditlarning talon-toroj bo‘lishining oldini olish maqsadida bir qancha ishlarni amalga oshirish ko‘zda tutilganini aytdi. Bu haqda “Daryo” muxbiri xabar bermoqda.
“Yoshlar – kelajagimiz” jamg‘armasi kreditlarni oldin NNT shaklda bergan bo‘lsa, hozirgi vaqtda bu yo‘q, xabarlaringiz bo‘lsa kerak. Bu allaqachon o‘zgartirildi. Biz ayni paytda yoshlar uchun kreditlar berishda birinchi o‘rinda imtiyozlardan voz kechishni rejalashtiryapmiz. Imtiyozsiz kredit bo‘lsa, talon-taroj kam bo‘ladi”, — dedi Sa’dullayev.
Avvalroq Toshkent viloyatining Piskent tumanida “Yoshlar — kelajagimiz” davlat dasturi doirasida ajratilgan 1,3 milliard so‘mlik imtiyozli kreditni talon-toroj qilgan fermer xo‘jaligi rahbariga jinoyat ishi qo‘zg‘atilgani, Zangiotada “Yoshlar — kelajagimiz” jamg‘armasi rahbarlari 400 million so‘mdan ortiq kredit mablag‘larini talon-toroj qilgani aniqlangani haqida xabar berilgan edi. Shuningdek, “Yoshlar — kelajagimiz” jamg‘armasining jami 1 milliard 191,3 million so‘m pulni o‘zlashtirish yo‘li bilan talon-toroj qilgan bosh hisobchisi ishdan olingani ma’lum qilingandi.
Izoh (0)