Бош вазир ўринбосари, туризм ва спорт вазири Азиз Абдуҳакимов 25 май, сешанба куни «Тошкент 5 ташаббус ҳаракати» ёшлар фестивали доирасида ўтказилган учрашувда бир шахснинг бир неча лавозимларда ишлаши қанчалик тўғри экани ҳақидаги саволга жавоб қайтарди. Бу ҳақда «Дарё» мухбири хабар бермоқда.
«Мен ўзимча бориб, бу лавозимларни талаб қилиб олганим йўқ. Бир йўналишда ўсиш, уни ижро этиш осонроқ бўлади. Эътибор берсангиз, ҳар бир лавозим мантиқий нуқтаи назардан боғланган. Яъни барчаси туризмга оид. Барибир ҳам бу вазифаларни бажарар эдим.
Алоҳида айтишим керакки, кўпчиликни яна битта нарса қизиқтиради. Шунча жойда ишлаб туриб, ҳаммасидан ойлик оладими, қаерга ишлатади, деган саволлар бўлиши, шубҳасиз. Мен фақат бош вазир ўринбосари сифатида ойлик оламан.
Менинг ўйлашимча, албатта, вақти-соати келади, уларнинг ҳаммаси ўз эгасини топади. Ёшларимиз тезроқ ўзини кўрсатамиз деса, раҳбарият, албатта, лозим топса, ёшларимизни шу лавозимларга қўйишади, лойиқ топишади», — деди Абдуҳакимов.
Изоҳ (0)