Катта Фарғона каналининг чўмилиш мумкин бўлмаган ҳудудида 15 ёшли ўсмир чўкиб кетди. Унинг жасади 16 май куни канал тубидан олиб чиқилди. Бу ҳақда «Севимли» телеканалининг «Замон» информацион дастурида маълум қилинди.
Қайд этилишича, Фарғона вилояти Қўқон шаҳрининг Алишер Навоий мавзесидан келган 3 нафар ўсмир 15 май куни Катта Фарғона каналининг Ўзбекистон туманидан оқиб ўтган қисмида чўмилмоқчи бўлган. Чўмилаётган болалардан бири каналнинг нариги қирғоғига ўтаётган пайтда бехосдан чўкиб кетган.
Тез орада воқеа жойига туман ИИБдан хабар топган Ўзбекистон тумани Фавқулодда вазиятлар бўлими қутқарув-қидирув ходимлари етиб келган.
Дастлаб, 15 май куни туман ички ишлар бўлими ходимлари билан ҳамкорликда қидирув ишлари олиб борилган. 16 май куни Фарғона вилояти Фавқулодда вазиятлар бошқармаси махсус вазифаларни бажарувчи минтақавий қидирув-қутқарув махсус отряди сувда қутқарув гуруҳи томонидан қидирув ишлари олиб борилган.
Кўрилган чора-тадбирлар натижасида Қўқон шаҳрида истиқомат қилувчи 2006 йилда туғилган, 15 яшар фуқаронинг жонсиз танаси ғаввос қутқарувчилар томонидан каналнинг тубидан олиб чиқилган.
Эслатиб ўтамиз, 2021 йилнинг 5 мартида 13 ёшли спортчи йигит ушбу каналда чўкиб кетганди. Спортчининг жасади 8 март куни икки метр чуқурликдан топилганди.
Мавзуга доир:
Изоҳ (0)