Hukumat qarori bilan Vazirlar Mahkamasining “Bolalarni davlat maktabgacha ta’lim muassasalariga qabul qilish bo‘yicha davlat xizmatlari ko‘rsatishning ma’muriy reglamentini tasdiqlash to‘g‘risida”gi qaroriga o‘zgartirishlar kiritildi.
O‘zgartirishlarga ko‘ra, maktabgacha ta’lim tashkilotlarga ustunlik bilan qabul qilinish huquqiga ega bolalar ro‘yxati (imtiyozli ro‘yxat) yangilandi.
Endilikda bolalarning quyidagi kontingenti bog‘chaga ustunlik bilan qabul qilinish huquqiga ega bo‘ladi:
- I va II guruh nogironligi bo‘lgan shaxslarning bolalari (ilgari – nogiron bo‘lgan shaxslarning bolalari);
- ko‘p bolali oilalarning bolalari;
- yetim bolalar yoki ota-onasining qarovisiz qolgan bolalar;
- “ayollar daftari”ga kiritilgan ijtimoiy himoyaga muhtoj yolg‘iz ayollarning bolalari;
- kontrakt bo‘yicha harbiy xizmatchilarning va ichki ishlar organlari xodimlarining bolalari (ilgari – harbiy xizmatchilarning va huquqni muhofaza qilish organlari xodimlarining bolalari);
- talabalar va pedagoglarning bolalari;
- akalari yoki opalari ushbu muassasaning tarbiyalanuvchilari jumlasidan bo‘lgan bolalar;
- ko‘p tarmoqli ixtisoslashtirilgan maktabgacha ta’lim tashkilotlardan umumiy turdagi maktabgacha ta’lim tashkilotlarga o‘tkazilayotgan sog‘aygan bolalar (ilgari – boshqa muassasalardan o‘tkazilgan bolalar).
Bolalarni imtiyozli ro‘yxat bo‘yicha qabul qilish davlat-xususiy sheriklikka asoslangan nodavlat maktabgacha ta’lim tashkilotlariga tatbiq etilmaydi.
2020/2021-o‘quv yilining 31-may kuniga qadar 7 yoshga to‘ladigan bolalarning so‘rovnomalari ushbu sanada bekor qilinadi hamda avtomatik ravishda navbatdan chiqariladi.
Bundan avval O‘zbekistonda 450 mingga yaqin xotin-qiz “ayollar daftari”ga kiritilgani, O‘zbekistonda nogironligi bo‘lgan shaxslar ishlari bo‘yicha idoralararo kengash tuzilgani hamda O‘zbekistonda 1-maydan “bog‘cha puli” o‘rtacha 15 foizga oshirilgani haqida xabar berilgandi.
Izoh (0)