O‘zbekiston–Tojikiston demarkatsiya qo‘shma komissiyasining navbatdagi yig‘ilishi bo‘lib o‘tdi

Tojikistonda ikki mamlakat vakillari o‘zbek-tojik chegaralari demarkatsiya ishlarini muhokama qildi, deya xabar bermoqda Tashqi ishlar vazirligi.

Qayd etilishicha, 2021-yilning 17–22-may kunlari Tojikistonning Xo‘jand shahrida O‘zbekiston va Tojikiston hukumat delegatsiyalari ishchi guruhlarining O‘zbekiston–Tojikiston demarkatsiya qo‘shma komissiyasi doirasidagi navbatdagi yig‘ilishi bo‘lib o‘tdi.

Muzokaralar davomida tomonlar O‘zbekiston–Tojikiston davlat chegaralarida demarkatsiya ishlarini muhokama qildi, demarkatsiya qilish liniyasi loyihasini hamda o‘zbek–tojik davlat chegarasida chegara belgilarini o‘rnatish bo‘yicha fikr almashdi.

Tomonlar O‘zbekiston–Tojikiston Davlat chegarasida demarkatsiya ishlarini davom ettirishga kelishib oldi.

Tadbir yakuni bo‘yicha Protokol imzolandi.

Bundan avval O‘zbekiston—Tojikiston chegarasida chegaraviy hamkorlik idoralari ochilgani, Qirg‘iziston va Tojikiston ikki davlat chegarasida hibsga olingan fuqarolarni almashgani hamda Shavkat Mirziyoyev Tojikistonga tashrifi doirasida Xo‘jandga ham borishi kutilayotgani haqida xabar berilgandi.