Toshkent shahar hokimi Jahongir Ortiqxo‘jayev “Toshkent 5 tashabbus harakati” yoshlar festivali doirasida o‘tkazilgan matbuot anjumanida festival uchun qancha mablag‘ ajratilgani haqida so‘z yuritdi. Bu haqda “Daryo” muxbiri Mirolim Isajonov xabar bermoqda.
“Bu tadbir besh kun deyilgani bilan, agar yoshlar ma’qul keladigan bo‘lsa, muddat uzayishi mumkin. Shu boisdan ajratilgan mablag‘lar miqdori ham o‘sish ehtimoli bor. Hozircha dastlabki xarajatlar bo‘yicha 1 milliard so‘m o‘tkazib beryapmiz. Bu summa festival qo‘shimcha tanlovlar evaziga oshishi mumkin”, — dedi Ortiqxo‘jayev.
Uning ta’kidlashicha, festivalda qatnashayotgan yigit-qizlar onlayn ro‘yxatdan o‘tgan. “Festivalda ishtirok etish uchun onlayn ro‘yxatdan o‘tildi. Ya’ni barcha ishtirokchilar arizalari onlayn qabul qilindi. Shunday ekan unda respublikamizning barcha yoshlari ro‘yxatdan o‘tishi mumkin bo‘ldi. Bu Toshkent yoshlari festivalida barcha viloyatlar, umuman, butun respublikadan yoshlar ishtirok etish imkoniyatiga ega degani”, — dedi poytaxt hokimi.
Shuningdek, Ortiqxo‘jayev, tadbirdan ko‘zlangan asosiy maqsad shaharda bor yoshlar orasida iqtidorlarini aniqlab, ularning kelajakdagi faoliyatida ko‘mak berish, bayramni ko‘tarinki ruhda o‘tkazish va yoshlar o‘rtasida iqtidorlarni o‘zini namoyon qilishi uchun ochiq maydon yaratib berishdan iborat ekanini bildirdi.
Izoh (0)