O‘zbekiston Prezidentining fuqarolar huquqlarini himoya qilish va murojaatlar bilan ishlash masalalari bo‘yicha maslahatchisi, favqulodda vaziyatlar vaziri vazifasini bajaruvchi Tursinxon Xudoyberganov “O‘zbekiston Respublikasida xizmat ko‘rsatgan yoshlar murabbiyi” faxriy unvoni bilan taqdirlandi. Bu haqda vazirlik matbuot xizmati xabar berdi.
“Ushbu unvon davlat organlari va huquq-tartibot idoralaridagi ko‘p yillik samarali mehnati, mamlakatimiz mustaqilligini mustahkamlash, yurtimizda olib borilayotgan keng ko‘lamli islohotlarni muvaffaqiyatli amalga oshirish, hududlarni kompleks rivojlantirish ishlariga qo‘shgan munosib hissasi, xalq bilan ochiq muloqotni yo‘lga qo‘yish, muammolarni joyida bartaraf etish, fuqarolarning huquq va erkinliklari, qonuniy manfaatlarini ro‘yobga chiqarish borasidagi katta xizmatlari, yosh avlodni ona Vatanga muhabbat ruhida tarbiyalash, mard va jasur, o‘z burchiga sadoqatli kadrlarni tayyorlash yo‘lidagi ibratli faoliyati hamda tavalludining 70 yilligi munosabati bilan berildi”, — deyiladi xabarda.
Tursinxon Xudoyberganov 1951-yilning 20-may sanasida Toshkentda tug‘ilgan. Ma’lumoti — oliy, 1974-yilda Nizomiy nomidagi Toshkent pedagogika institutini, 1982-yilda Toshkent militsiya maktabini tamomlagan. 2018-yildan buyon favqulodda vaziyatlar vaziri vazifasini bajaruvchi, 2020-yildan Oliy Majlis Senati a’zosi hisoblanadi.
Izoh (0)