Тошкент шаҳар ҳокими Жаҳонгир Ортиқхўжаев «Тошкент 5 ташаббус ҳаракати» ёшлар фестивали доирасида ўтказилган матбуот анжуманида фестиваль учун қанча маблағ ажратилгани ҳақида сўз юритди. Бу ҳақда «Дарё» мухбири Миролим Исажонов хабар бермоқда.
«Бу тадбир беш кун дейилгани билан, агар ёшлар маъқул келадиган бўлса, муддат узайиши мумкин. Шу боисдан ажратилган маблағлар миқдори ҳам ўсиш эҳтимоли бор. Ҳозирча дастлабки харажатлар бўйича 1 миллиард сўм ўтказиб беряпмиз. Бу сумма фестиваль қўшимча танловлар эвазига ошиши мумкин», — деди Ортиқхўжаев.
Унинг таъкидлашича, фестивалда қатнашаётган йигит-қизлар онлайн рўйхатдан ўтган. «Фестивалда иштирок этиш учун онлайн рўйхатдан ўтилди. Яъни барча иштирокчилар аризалари онлайн қабул қилинди. Шундай экан унда республикамизнинг барча ёшлари рўйхатдан ўтиши мумкин бўлди. Бу Тошкент ёшлари фестивалида барча вилоятлар, умуман, бутун республикадан ёшлар иштирок этиш имкониятига эга дегани», — деди пойтахт ҳокими.
Шунингдек, Ортиқхўжаев, тадбирдан кўзланган асосий мақсад шаҳарда бор ёшлар орасида иқтидорларини аниқлаб, уларнинг келажакдаги фаолиятида кўмак бериш, байрамни кўтаринки руҳда ўтказиш ва ёшлар ўртасида иқтидорларни ўзини намоён қилиши учун очиқ майдон яратиб беришдан иборат эканини билдирди.
Изоҳ (0)