Ўзбекистон Президенти Шавкат Мирзиёев 21 май куни видеоанжуман шаклида ўтган Евросиё иқтисодий кенгашининг навбатдаги йиғилишида иштирок этди. Бу ҳақда Президент матбуот хизмати хабар берди.
Қозоғистон президенти Қосим-Жўмарт Тўқаев раислигида ўтган Олий кенгашнинг навбатдаги йиғилишида кенгаш фахрий раиси, Қозоғистоннинг Биринчи президенти — элбоши Нурсултон Назарбоев, Арманистон бош вазири вазифасини бажарувчиси Никол Пашинян, Беларусь президенти Александр Лукашенко, Қирғизистон президенти Садир Жапаров, Россия президенти Владимир Путин, ЕОИИ ҳузуридаги кузатувчи давлат — Куба президенти Мигел Бермудес ва Евросиё иқтисодий комиссияси ҳайъати раиси Михаил Мясникович ҳам иштирок этди.
Тадбир кун тартибидан иқтисодиётнинг турли тармоқларида амалий ҳамкорлик қилиш ҳамда ЕОИИ фаолиятини такомиллаштиришга доир долзарб масалалар ўрин олди.
Шавкат Мирзиёев ўз нутқида ҳал этилиши ўзаро мувофиқлашган ёндашувларни талаб этувчи энг муҳим вазифаларга алоҳида тўхталди.
Хусусан, қуйидагилар алоҳида қайд этилди:
- савдо муносабатларини, шу жумладан, тўсиқларни бартараф этиш ва савдони нотариф тартибга солиш чораларини яқинлаштириш орқали янада кенгайтириш учун салмоқли салоҳият мавжуд;
- мамлакатларнинг етакчи корхоналари ва ҳудудларнинг саноат кооперациясини мустаҳкамлаш, Евросиё тараққиёт банкини жалб қилган ҳолда иқтисодиётнинг реал сектори тармоқларида ҳамда озиқ-овқат хавфсизлигини таъминлаш бўйича лойиҳаларни илгари суриш муҳим аҳамиятга эга;
- транспорт-транзит соҳасидаги долзарб масалаларни ҳал қилиш ва юк ташиш ҳажмини ошириш мақсадида ўзаро имтиёзларни кенгайтириш лозим.
«Мамлакатларимизда аҳолини эмлаш орқали амалга оширилаётган эпидемиологик вазиятнинг барқарорлашишини ҳисобга олиб, биз ҳаво ва темир йўл йўловчиларининг мунтазам қатновини тиклаш вақти келди, деб ўйлаймиз» – деди давлат раҳбари.
Бундан ташқари, Ўзбекистоннинг ЕОИИ солиқ ва божхона маъмуриятчилиги, саноат, меҳнат миграцияси ва туризм бўйича рақамли платформаларига уланиш имконияти кўриб чиқилмоқда, шунингдек, бошқа қатор устувор йўналишлар борасида ҳамкорлик қилиш имкониятлари ўрганилмоқда, дейилади хабарда.
Президент ўз нутқида «ҳозирги мураккаб шароитда ёндашувларни мувофиқлаштиришни талаб қиладиган» вазифаларни санаб ўтди. Улар орасидан ЕОИИга аъзо ва кузатувчи давлатларнинг илғор корхоналари ва ҳудудларининг тижорий алоқаларини йўлга қўйиш ва саноат кооперацияларини жадал ривожлантириш ўрин олди.
«Биз иқтисодиётнинг реал секторида, шунингдек озиқ-овқат хавфсизлигини таъминлашда ҳамкорлик қилиш учун катта имкониятларни кўряпмиз», – дея қўшимча қилди у.
Ўзбекистон президенти сўзининг якунида кузатувчи давлат сифатида Евросиё иқтисодий иттифоқи билан ҳамкорлигида аниқ ва сезиларли натижаларга эришиш муҳим эканини яна бир бор таъкидлади.
«Яна бир бор таъкидлайман, Ўзбекистон учун кузатувчи сифатида ЕОИИ билан ўзаро алоқаларнинг аниқ, сезиларли натижаларига эришишни таъминлаш муҳим. Ушбу мақсадларда, жумладан, товарлар, капитал, меҳнат ресурслари ва хизматларнинг айланиш жараёнини соддалаштириш масалалари бўйича тизимли ҳамкорликни изчил ривожлантириш зарур деб ҳисоблаймиз. Очиқ ва конструктив мулоқотни кутмоқдамиз. Аминманки, бундай шерикчилик янги имкониятларни очади, мамлакатларимизнинг барқарор иқтисодий ривожланиши, халқларимиз фаровонлигининг юксалишига қўшимча туртки беради», — деди у.
Эслатиб ўтамиз, Ўзбекистон Евросиё иқтисодий иттифоқи ҳузуридаги кузатувчи давлат мақомини ушбу ташкилотнинг 2020 йил 11 декабрдаги саммитида олган эди.
Бундан аввал Ўзбекистон Европа Иттифоқига божхона божисиз экспорт қиладиган маҳсулотлар қатори икки баробарга ошгани, Инвестициялар ва ташқи савдо вазирлиги тузилмасида Россия билан ҳамкорлик бошқармаси ташкил этилгани ҳамда Ўзбекистон ЕОИИ билан инвестициявий ҳамкорликни оширишга тайёрлиги ҳақида хабар берилганди.
Изоҳ (0)