19 май куни юз берган кучли шамол таъсирида Андижон вилоятининг шаҳар ва туманларида электр тармоғи хўжалиги объектларида авариявий ҳолатлар ва носозликлар юзага келди. «Ўзэнергоинспекция» матбуот хизматининг «Дарё»га маълум қилишича, бунинг оқибатда истеъмолчиларга электр энергия етказишда узилишлар кузатилган.
Хусусан, Хўжаобод туман электр таъминоти корхонаси тасарруфидаги 10 кВ кучланишли «Мустаҳкам» ҳаво электр узатиш линиясининг «Кўприкбоши» маҳалласи ҳудудидан ўтган қисмида, кўп йиллик терак дарахтларининг кучли шамол таъсирида йиқилиши натижасида темир-бетон таянчлар синиб, электр узатувчи симлар узилган. Бунинг оқибатида мавжуд электр тармоғига зарар етиб, туманнинг «Кўприкбоши», «Қорабулоқ» ва «Учкўча» МФЙ ҳудудларида жойлашган истеъмолчиларнинг электр таъминотида жиддий узилиш юзага келган.
Содир бўлган авария ва носозликларни бартараф қилиш бўйича «Андижон ХЭТК» АЖнинг шаҳар ва туман электр таъминоти корхоналарида тезкор таъмир гуруҳлари ташкил қилинди. «Ўзэнергоинспекция» авария ва носозликларни бартараф қилиш жараёнида хавфсизлик чора-тадбирларининг бажарилишини тўлиқ назоратга олган.
Ҳолат бўйича инспекция ҳудудий бўлими Хўжаобод ТЭТКнинг масъул ходимлари билан биргаликда жойида ўрганилиб, юзага келган аварияни бартараф қилиш ва электр тармоғини тиклаш чора-тадбирлари тузилган.
Таъмирлаш ишларига мутахассислар ва «Андижон ХЭТК» АЖнинг бўлимлари томонидан махсус техникалар жалб қилиниб, носозликлар шу куннинг ўзида бартараф қилинган.
Аввалроқ 20 май куни Тошкентда кузатилган кучли шамол оқибатида Malibu устига дарахт қулагани, ерусти метро бекатларидан бирининг том қисмига зарар етказгани ҳақида хабар берилган эди. Шамол оқибатида пойтахтнинг Сергели ва Зангиота туманларига тегишли «Ўзгариш» ҳудудида электр тармоғида узилиш юзага келган, шунингдек, Тошкент вилоятининг Олмалиқ шаҳридаги айрим маҳаллалар, Ангрен шаҳрининг катта қисми электр таъминотисиз қолган. Оҳангарон шаҳрида шамол таъсирида ҳатто ичимлик суви ҳам ўчганди.
Изоҳ (0)