Қашқадарё вилоятининг Муборак туманида қўшниларининг қўй-қўзиларини ўғирлаб, сўйиб сотишни касб қилиб олган фуқаро 3 йил муддатга озодликдан маҳрум қилинди. Бу ҳақда «Дарё»га Жиноят ишлари бўйича туман суди раиси Алишер Қаҳҳоров хабар берди.
Маълум бўлишича, Муборак туманининг «Муборак» маҳалласида истиқомат қилувчи 38 ёшли фуқаро Азамат Собиров (исм-фамилия ўзгартирилган) 2020 йилнинг 5 декабридан 2021 йилнинг 5 февралига қадар бўлган вақт оралиғида қўшниларига тегишли ўн бошга яқин қўй-қўзиларни уларнинг молхонасидан ўғирлаб чиқиб, сўйиб сотишни касб қилиб олган.Жумладан, у 2020 йилнинг 5 декабридан 6 декабрга ўтар кечаси қўшнисининг ҳовлисига девордан ошиб тушиб, молхонасидаги қиймати 1 миллион 200 минг сўм бўлган қўзини ўғирлаб чиқиб, қурилиши битмаган бинога олиб борган ва сўйиб ўзга шахсга сотган. У жиноий қилмишини давом эттириб, 2020 йилнинг 15 декабридан 16 декабрга ўтар кечаси яна бир қўшнисининг ҳовлисига яширин равишда кириб, молхонасидан нархи 2 миллион 400 минг сўм бўлган икки бош қўзини ўғирлаб кетган. Қўзиларни қурилиши битмаган бинога олиб бориб, сўйган ва гўштини ўзига таниш бўлган фуқароларга сотган.
«Судланувчи 2020 йилнинг 5 декабридан 2021 йилнинг 5 февралига қадар бўлган вақт давомида бир нечта фуқарога тегишли қўй-қўзиларни уларнинг ҳовлисидан ўғирлаб чиқиб, сўйиб сотган. Ва пулини ўз эҳтиёжлари учун сарфлаган», — дейди судья Алишер Қаҳҳоров.
Жиноят ишлари бўйича Муборак туман суди қўй-қўзи ўғирлаб, сўйиб сотишни касб қилиб олган 38 ёшли фуқарони Жиноят кодексининг 169-моддаси 3-қисми «а» банди (такроран ёки хавфли рецидивист томонидан ўғрилик) билан айблаб, уни 3 йил муддатга озодликдан маҳрум қилди.
Изоҳ (0)