Самарқанд ва Жиззах вилоятларида 20 май куни ҳар бирининг қуввати 180—220 МВт бўлган қуёш фотоэлектр станцияларини (ҚФЭС) қуриш лойиҳалари бўйича тендер ғолиблари аниқланди, деб хабар бермоқда Энергетика вазирлиги матбуот хизмати.
Abu Dhabi Future Energy Company PJSC (Masdar 220 МВт) компанияси электр энергиясининг ҳар бир кВт соатига 1,791 сент (1,57 сент электр энергияси учун ва + 0,221 сент электр тармоғи ускуналари учун) таклифи билан Самарқанд вилоятининг Каттақўрғон туманида ҚФЭС қуриш бўйича тендер ғолиби деб топилди.
Инвестициялар ва ташқи савдо вазирлиги маълумотларига кўра, Jinko Power Technology Co. Ltd., China Power International Holding (CPIH) Ltd. ва Jinko Power (HK) Cо. Ltd. консорциуми ишлаб чиқариладиган 1 кВт соат электр энергия учун 2,305 сентга тенг бўлган тарифи билан ушбу тендернинг захира ғолиби деб эълон қилинди.
Abu Dhabi Future Energy Company PJSC (Masdar) ишлаб чиқариладиган 1 кВт соат электр энергия учун 1,823 сентга тенг бўлган тарифи билан Жиззах вилоятида қуёш электр станциясини қуриш бўйича халқаро тендерда ҳам ғолиб бўлди.
Jinko Power Technology, China Power International Holding ва Jinko Power (HK) консорциуми ишлаб чиқариладиган 1 кВт соат электр энергия учун 2,305 сентга тенг бўлган тарифи билан ушбу тендернинг захира ғолиби деб эълон қилинди.
Дастлабки малака танловида Хитой, Жанубий Корея, Япония, Саудия Арабистони, Бирлашган Араб Амирликлари, Ҳиндистон, Жанубий Африка, Россия, Испания, Норвегия ва Франциядан 18 та компания иштирок этган, улардан 15 таси ушбу танловдан муваффақиятли ўтди.
Иштирокчи компанияларнинг тақдим этилган таклифларини баҳолаш натижаларига кўра, Жиззах вилоятидаги лойиҳа бўйича 7 та компания ( Masdar, ACWA Power, Risen Energy, Jinko Power Technology, China Power International Holding ва Jinko Power консорциуми, KEPCО, Samsung C&T Corporation ва KIND консорциуми, PowerChina ва Jiangsu Linyang Energy консорциуми, Total Eren S.А. ва Total Solar INT консорциуми), Самарқанд вилоятидаги лойиҳа бўйича эса 6 компанияга (Risen Energy’дан ташқари юқоридаги барча компанияларга) электр энергияси тарифлари тўғрисидаги молиявий таклифларнинг очилишига рухсат берилган.
Қуёш электр станциялари 2022 йилнинг охиригача ишга туширилиши кутилмоқда. Электр станцияларининг ишга туширилиши йилига 1,04 миллиард кВт соат электр энергиясини ишлаб чиқаришни таъминлайди. Ушбу икки лойиҳани амалга ошириш учун жалб қилинадиган инвестициялар миқдори 400 миллион долларга баҳоланмоқда.
«Gazeta.uz» Masdar компанияси бундан аввал ҳам Ўзбекистонда бир неча лойиҳаларни амалга ошириш бўйича ғолиб бўлганини эслатиб ўтган. Хусусан, компания Навоий вилоятида қуввати 100 МВт бўлган қуёш фотоэлектр станцияси, Зарафшонда қуввати 500 МВт бўлган шамол электр станцияси, Тошкент вилоятида қуввати 40 кВт бўлган кичик электр станцияси қурилиши ва бошқа лойиҳалар билан шуғулланади.
20 май куни бўлиб ўтган тендер савдоларида 84 та халқаро компания иштирок этиш истагини билдирган. Шулардан икки босқичли танловдан ўтганидан сўнг 15 та малакали иштирокчи таклифларни, шу жумладан, тижорат, техник ва молиявий таклифларини билдирган. 16 майга қадар таклифларни қабул қилиш давомида Самарқанд вилоятида 7 та лойиҳа ва Жиззах вилоятида 8 та лойиҳа таклифи келиб тушган.
Ушбу лойиҳалар Ўзбекистонда умумий қуввати 1 ГВт бўлган қуёш фотоэлектр станцияларини қуриш дастурининг бир қисми ҳисобланиб, у Энергетика вазирлиги, Инвестициялар ва ташқи савдо вазирлиги ва Молия вазирлиги томонидан амалга оширилмоқда. Дастурга Халқаро молия корпорацияси техник ёрдам кўрсатади.
Изоҳ (0)