21-maydan boshlab Toshkent metropolitenining “Chilonzor” va “O‘zbekiston” yo‘nalishlarining ish tartibi vaqtincha soat 06:00 dan 23:00 gacha etib belgilanadi. Bu haqda “O‘zbekiston temir yo‘llari” AJ matbuot xizmati xabar berdi.
Ma’lumot uchun, bunga qadar Toshkent metropolitenining “Yunusobod” yo‘nalishi soat 23:00 gacha, “Chilonzor” va “O‘zbekiston” yo‘nalishlari esa soat 00:00 gacha yo‘lovchilarga xizmat ko‘rsatar edi.
So‘nggi paytlarda ijtimoiy tarmoqlarda Toshkent metropoliteni bilan bog‘liq kamchiliklar haqida ko‘p marotaba yozib kelinmoqda. Xususan, 13-may kuni “Amir Temur xiyoboni” bekatida barcha yo‘lovchilar tushirib yuborilgan, 7-may kuni soat 21:10 dan 22:00 gacha Toshkent metropoliteni Halqa yo‘lining 7-bekatida elektr energiyasi o‘chib qolgandi. Hodisa metro poyezdlari harakatiga ta’sir ko‘rsatmagan.
9-aprel kuni ijtimoiy tarmoqlarda poyezdning ochiq eshiklar bilan harakati tushirilgan video tarqaldi. Shu bilan birga, metropolitendagi yerosti va yerusti poyezd harakatlarining bir nechta boshqa videolari ham ijtimoiy tarmoqlarda ko‘p bora muhokama qilindi. 28-aprel kuni esa tunnelda to‘xtab qolgan poyezd haqidagi video tarqaldi, unda yo‘lovchilar relslar orqali harakatlanib, bekatga yetib olgani tasvirlangan.
18-mart kuni esa “Olmazor” (Chilonzor yo‘li) va “Bekat-1” (Sergeli yo‘li) orasidagi tunnelda ikki poyezd to‘qnashgandi.
Izoh (0)