Prezident Shavkat Mirziyoyev raisligida o‘tkazilgan yig‘ilishda davlat rahbari viloyat hokimlari mahalliy budjet hisobidan tor doiradagi xizmatlar yo‘lga qo‘yiladigan hududiy tibbiyot muassasalarini yuqori texnologik uskunalar va tibbiyot vositalari bilan ta’minlashga mas’ul bo‘lishini ta’kidladi. Bu haqda “Daryo” muxbiri xabar bermoqda.
“Sog‘liqni saqlash vaziri o‘rinbosari Ulug‘bek Sobirov 17 ta ixtisoslashgan markazlar direktorlari bilan birga, ikki hafta muddatda respublika, viloyat va tuman shifoxonalarida davolash lozim bo‘lgan kasalliklar ro‘yxatini tasdiqlab, quyi bo‘g‘in shifokorlari malakasini oshirishni boshlasin.
Ikki oy muddatda ixtisoslashgan markazlarga Yevropa davlatlari, Koreya, Rossiya, Turkiyadan tibbiyot boshqaruvi ekspertlari jalb qilinadi.
Shuningdek, ikki oy muddatda xususiy tibbiyot tashkilotlariga litsenziya berish tartibi soddalashtirilib, jarayonlar to‘liq raqamlashtiriladi.
Umuman, Sobirovga ixtisoslashgan markazlar va ularning filiallari rahbarlarini lavozimga tayinlash va lavozimidan ozod etish, jihozlash bo‘yicha loyihalar ishlab chiqish, tender o‘tkazish va shartnoma tuzish, markazlarga budjet mablag‘lari va orderlarni taqsimlash vakolatlari beriladi”, – dedi davlat rahbari.
Bundan avval Shavkat Mirziyoyev tibbiyot tizimida 5 ta yo‘nalishda jiddiy o‘zgarishlar qilinishini aytgani, Shavkat Mirziyoyev 20 ta tumanning tibbiyot birlashmalari faoliyatini tanqid qilgani hamda Shavkat Mirziyoyev 1-iyuldan boshlab surunkali kasalliklarni birlamchi bo‘g‘inda davolash bo‘yicha yangi tizim joriy etilishini ma’lum qilgani haqida xabar berilgandi.
Izoh (0)