“Ixtisoslashgan markazlarni tumanbay va mahallabay ishlashga o‘rgatish zarur” – Shavkat Mirziyoyev

Ftiziatriya va Pediatriya markazlari O‘zbekistonning hamma hududida o‘z filiallarini tashkil etgani tufayli Toshkent shahriga keluvchi bemorlar soni so‘nggi 2 yilda qariyb 20 foizga kamaygan. Bu haqda Prezident Shavkat Mirziyoyev raisligida o‘tkazilgan yig‘ilishda ma’lum qilindi, deya xabar bermoqda “Daryo” muxbiri.

“Sog‘liqni saqlash vaziri o‘rinbosari Ulug‘bek Sobirov ixtisoslashgan markazlarini isloh qilishi, ularni tumanbay va mahallabay ishlashga o‘rgatishi zarur.

Misol uchun, Ftiziatriya va Pediatriya markazlari barcha hududlarda o‘z filiallarini tashkil etgani bois poytaxtga keluvchi bemorlar soni so‘nggi 2 yilda qariyb 20 foizga kamaygan. Shu bilan birga, Neyroxirurgiya markaziga boshqa hududlardan murojaatlar kamaygan bo‘lsa-da, filial tashkil etilmagan Xorazm viloyatidan qatnov 60 foizga ortgan.

Shu bois Sobirov ixtisoslashgan markazlar bilan viloyat, tuman va shahar tibbiyot muassasalarini bir-biriga bog‘lash bo‘yicha mutlaqo yangi tizimni yaratishi zarur.

Misol uchun, jarrohlik amaliyotini talab etmaydigan yurak qon-tomir, oshqozon-ichak, nafas yo‘llari, teri kasalliklariga diagnoz qo‘yish, davolash va reabilitatsiya jarayonlarini tumanlarda amalga oshirish mumkin”, – dedi Prezident.

Davlat rahbarining ta’kidlashicha, ko‘z mikroxirurgiyasi, yurak qon-tomirda stentlash, urologiya, travmatologiya, ko‘krak va qorin bo‘shlig‘i yo‘nalishlaridagi jarrohlik muolajalarini viloyat darajasida tashkil qilish uchun barcha sharoitlar yetarli.

“Buning uchun Travmatologiya markazi – Qoraqalpog‘iston, Surxondaryo va Toshkent viloyatida protezlash;

Xirurgiya va Shoshilinch markazlar – Samarqand, Namangan va Xorazmda buyrak transplantatsiyasi;

Kardiologiya markazi – Andijon, Navoiy va Qashqadaryoda yurak qon-tomirda stentlash va bolalar yurak jarrohligi;

Urologiya markazi – Qoraqalpog‘iston, Jizzax va Farg‘onada buyrakdan tosh olish muolajalarini yo‘lga qo‘yilishi shart.

Respublika markazlarida esa, faqat murakkab tashxisli kasalliklar va yuqori texnologik amaliyotlar bajarilishi ustuvor bo‘lishi kerak”, – dedi Shavkat Mirziyoyev.

Bundan avval Shavkat Mirziyoyev 1-iyuldan boshlab surunkali kasalliklarni birlamchi bo‘g‘inda davolash bo‘yicha yangi tizim joriy etilishini ma’lum qilgani, Shavkat Mirziyoyev olis hududlarga shifokorlarni jalb qilish ishlari sust olib borilayotganini keskin tanqid qilgani hamda barcha tibbiyot muassasalarida elektron tizim bilan ishlaydigan 2 mingta IT-operator–hamshira lavozimi joriy etilishi haqida xabar berilgan edi.