Qozog‘istonda Chevrolet brendi avtomobillarining savdosi 4697 foizga o‘sdi. Bu haqda Qozog‘iston avtobiznes assotsiatsiyasiga tayanib, Spot xabar berdi.
2021-yil boshidan beri mamlakatda 8923 dona Chevrolet modellari sotilgan, 2020-yilning mos davrida ushbu ko‘rsatkich 186 tani tashkil etgan. Bu Chevrolet’ga eng ko‘p sotilgan brendlar reytingiga boshchilik qilish imkonini bergan.
Qozog‘istonliklar asosan Cobalt xarid qilmoqda, bir necha oydan buyon ushbu model birinchi o‘rinni egallab kelyapti. Mazkur model savdosi o‘smoqda — mart oyida 1001 donani tashkil etgan bo‘lsa, aprelga kelib 1355 taga yetgan. Ikkinchi o‘rinni Nexia egallagan (aprel oyida 1000 dan ortiq sotilgan).
Mamlakatda savdolar bo‘yicha Chevrolet’ning asosiy raqobatchisi Hyundai hisoblanadi. U brendlar orasida ikkinchi o‘rinni egallagan, Accent esa eng ko‘p sotilgan modellar orasida 3-o‘rinda ketmoqda.
“Newauto.kz” saytida (Qozog‘istondagi avtosalonlar agregatori) Cobalt narxi jamlanmasidan kelib chiqib, 4,7 million tengedan 5 million tengegacha ekani ko‘rsatilgan (113 milliondan 120 million so‘mgacha).
Avvalroq O‘zbekistonda 2021-yilning yanvar—mart oylarida jami 44 454 dona yengil avtomobil ishlab chiqarilgani, bu 2020-yilning mos davri (31 181 dona) bilan taqqoslaganda 42 foizga kamligi, O‘zbekiston eksport qilayotgan avtomobillarning deyarli barchasi Qozog‘iston hisobiga to‘g‘ri kelayotgani to‘g‘risida xabar berilgandi.
Eslatib o‘tamiz, 2020-yilning martida UzAuto Motors Qozog‘istonda Chevrolet ishlab chiqarishni boshlagan. Dastlabki bosqichda ishlab chiqarish hajmi yiliga 26 000 transport vositasini tashkil qiladi, kelgusida uni 100 000 donaga yetkazish ko‘zda tutilgan.
Izoh (0)