Ideal yozgi garderob — son sanog‘i yo‘q kiyimlar emas, balki eng kerakli liboslardir.
Jaziramada kiyimlar turli xil hayotiy vaziyatlarga mos bo‘lishi hamda eng muhimi havo o‘tkazadigan matodan tikilgan bo‘lishi muhim. Quyida har bir ayolga yoz davomida kerakli bo‘ladigan 5 ta kiyim haqida so‘z boradi.
Zig‘ir matosidan tikilgan kofta
Zig‘ir tolali kofta — yozning mohiyatini eng aniq ifoda etadigan libos, desak mubolag‘a bo‘lmaydi.
Zig‘ir matosidan tikilgan koftani har qanday kiyim bilan moslasa bo‘ladi: plyaj kiyimining ustiga, jinsilar bilan, mini yubka yoki uzun shimlar bilan.
Eng yaxshi modellari — biroz oversayz va orqasi uzunroq tikilgan koftalar. Mutaxassislar yozda oq, qaymoq rang, och ko‘k va jigarrang liboslarga e’tibor qaratishni tavsiya etishadi.
Umuman olganda, zig‘ir tolasidan tikilgan ko‘ylak yoz uchun mukammal mato: uni qancha ko‘p kiyib yuvsangiz, shunchalik yumshoq bo‘ladi.
Yengil jinsilar
Issiq havoda qalin denim kiyish biroz noqulay, lekin sevimli jinsilardan voz kechish ham mumkin emas. Yozda asosan yengil paxta matosidan tikilgan shimlar ayni muddao bo‘ladi. Ular ko‘rinishi bilan odatiy jinsilarni eslatadi, lekin kiyganingizda pijama kabi qulaylik beradi.
Keng bichimli oq jinsilar ham yaxshi tanlov.
Midi-yubka
Shortik va ko‘ylaklarga muqobil sifatida midi-yubka yaxshi tanlov. U tanani siqmaydi, poshnaga ehtiyoj qolmaydi, yengillik va muvozanat hissini yaratadi. Bunday turdagi yubkalar yurish uchun ham qulay, shuningdek havoni ham yaxshi o‘tkazadi.
Midi-yubkalarni qanday kiyish kerak? Paxtadan tikilgan kofta, kalta top, futbolka yoki bodi bilan kiyish ham mumkin. Bu ham nafis, ham qulay ko‘rinish beradi. Yozda ushbu yubka garderobingizdagi sevimli kiyimlaringizdan biriga aylanadi va u bemalol jinsilar o‘rnini bosishi mumkin.
Mayka yoki bodi
So‘nggi paytlarda paxta matosidan tikilgan maykalar ayollarning sevimli garderob elementiga aylanmoqda. Ularni alohida ham, yoki yengli koftalar ichidan ham kiyish mumkin.
Mayka jinsi shim, yubka hamda kostyumlar bilan kiyishga juda mos keladi. Bu yaxshi baza bo‘lib, ustidan qanday kiyimlar kiysangiz ham, yarashib turadi.
Keng shimlar
To‘g‘ri bichimli shimlar har qanday qomatdagi ayolga mos keladi. Jigarrang, oq, och kulrang va kakao ranglari yoz uchun ideal hisoblanadi.
Bu shimlar deyarli hamma narsa bilan uyg‘unlashadi: top va kofta shular jumlasidan. To‘g‘ri bichimli shim kiyganda oyog‘ingizga krossovka yoki baletka kiyishingiz mumkin.
Izoh (0)