Тиббиёт соҳасини рақамлаштириш учун бюджетдан ажратилган 28 миллиард сўм ўтган 4 ойда ҳали ўзлаштирилмаган. Бу ҳақда айни пайтда Президент Шавкат Мирзиёев раислигида ўтказилаётган йиғилишда давлат раҳбари қайд этди, дея хабар бермоқда «Дарё» мухбири.
«Тиббиётни рақамлаштириш ва хусусий шериклик бўйича барча ваколатлар ва масъулият соғлиқни сақлаш вазири ўринбосари Абдулла Азизовга ўтказилади.
Тиббиёт муассасаларига айни пайтда 50 мингта компьютер етишмайди. Мисол учун, Жомбойда 12 та оилавий поликлиника ва шифокорлик пунктидан 11 тасида компьютер ҳам, интернет ҳам йўқ.
Шу билан бирга, соҳани рақамлаштириш учун бюджетдан ажратилган 28 миллиард сўм ўтган 4 ойда ҳали ўзлаштирилмаган.
Энди вилоят тиббиёт бошқармаларида рақамлаштириш ва давлат-хусусий шериклик бўйича ўринбосар лавозими ташкил этилади ва улар соғлиқни сақлаш вазирининг ўринбосари Абдулла Азизовга бевосита бўйсунади. Шунингдек, барча тиббиёт муассасаларида электрон тизим билан ишлайдиган 2 мингта IT-оператор-ҳамшира лавозими жорий этилади.
Икки ҳафта муддатда тиббиёт ходимлари учун компьютер саводхонлиги бўйича IT-марказларда бепул ўқув машғулотлари ташкил этилади.
Азизов йил якунига қадар аҳолининг саломатлиги тўғрисидаги ҳамда тиббий жиҳозлар маълумотлар базаларини тўлиқ йўлга қўяди. 2021 йил 1 августга қадар электрон ордер тизимини ишга тушириб, барча ҳудудлар ва ихтисослашган марказларни уланишини таъминласин», – деди Президент.
Давлат раҳбари Абдулла Азизов (соғлиқни сақлаш вазири ўринбосари) ва Ғофуржон Мирзаевга (Сирдарё вилояти ҳокими) уч ой муддатда Гулистон шаҳридаги 1 та оилавий поликлиникани хусусий шерикликка бериш бўйича тажрибани бошлаши кераклигини айтиб, қатъий топшириқ берди.
«Абдулла Азизов Сирдарё вилояти ҳокими Мирзаев билан бирга, 1 августга қадар Сирдарё вилоятида, Алимов ва Хотам Шокиров билан бирга, 1 ноябрга қадар Тошкент шаҳрида барча поликлиникаларни тўлиқ рақамлаштирсин.
Азизов вилоят ҳокимлари билан бирга, йил якунига қадар янги 11 та хусусий шериклик битимларини имзоласин ва 6 та бошланган лойиҳани ишга туширсин.
Ушбу вазифаларни амалга ошириш учун Абдулла Азизов рақамлаштириш соҳасида тендер ўтказиш, шартнома имзолаш, IT бўйича раҳбарларни танлаш ва тайинлаш, хусусий шериклик ҳамда халқаро молия ташкилотлари билан ишлаш масалалари бўйича ўзи мустақил қарор қабул қилади. Бунда, харидлар натижасида иқтисод қилинадиган бюджет маблағларини ушбу йўналишдаги янги лойиҳаларга йўналтиради», – деди Шавкат Мирзиёев.
Бундан аввал Шавкат Мирзиёев олис ҳудудларга шифокорларни жалб қилиш ишлари суст олиб борилаётганини кескин танқид қилгани, Шавкат Мирзиёев 20 та туманнинг тиббиёт бирлашмалари фаолиятини танқид қилгани ҳамда Шавкат Мирзиёев тиббиёт тизимида 5 та йўналишда жиддий ўзгаришлар қилинишини айтгани ҳақида хабар берилганди.
Изоҳ (0)