Islandiyada harakatga kelgan Fagradalsfyadl vulqoni joylashgan yer maydoni sotuvga qo‘yildi, deb yozmoqda Bloomberg agentligi.
Foto: “News.pn”
“Bu yer maydoni mos narx evaziga sotilyapti, biz esa eng kamida ikkita taklifni olib bo‘ldik”, — deb xabar berdi Anna Tordis Gudmundsdottir. U vulqon joylashgan Xraun fermasiga egalik qiluvchi 19 nafar merosxo‘rdan biri hisoblanadi.
Gudmundsdottirning so‘zlariga ko‘ra, yer maydoniga oilaning bir necha avlodlari egalik qilib kelgan. Hozir esa u “ bu yerda kimdir jamiyat uchun foydaliroq nimadir qurishi”ni xohlaydi. Xraun yer egalari assotsiatsiyasining raisi, Gudmundsdottirning amakivachchasi Sigurdur Gudjon Gislasonning mahalliy Stod 2 telekanaliga xabar berishicha, xohlovchilar yer maydonini to‘liq yoki qisman sotib olishi mumkin.
Islandiya hukumati yer maydonini sotib olishni rejalashtirmayapti, lekin vulqon harakatga kelgan hududni sayyohlar uchun diqqatga sazovor joyga aylantirish uchun pul ajratadi, deb ta’kidladi Islandiya bosh vaziri Katrin Yakobsdottir RUV telekanaliga bergan intervyusida. Uning so‘zlariga ko‘ra, agar hudud jamoat uchun ochiqligicha qolsa, hukumat ushbu inshootda zarur infratuzilmani yaratish uchun 70 million Islandiya kronasini (564 ming dollar) yo‘naltirishga tayyor.
Fagradalsfyadl vulqoni Islandiyaning eng mashhur sayyohlik markazlaridan biriga aylanishi uchun barcha imkoniyatlarga ega, deb yozmoqda Bloomberg. Geologlarning prognozlariga ko‘ra, mamlakat poytaxti Reykyavikdan atigi bir soatlik masofada joylashgan vulqonning harakati yana bir necha yil davom etishi mumkin.
Fagradalsfyadl vulqoni 19-mart kuni kechqurun harakatga kelgan edi. Bundan oldin yarimorolda seysmik faollik kuzatilgan: to‘rt hafta ichida u yerda 50 mingdan ortiq zilzila qayd etilgan..
Associated Press nashrining ma’lumotlariga ko‘ra, vulqon 6 ming yildan buyon harakatga kelmagan edi. Vulqon otilishini tomosha qilish uchun minglab odamlar to‘plandi, ularning ba’zilari hattoki vulqon lavasida hot-dog uchun sosiskalar pishirdi, deb yozmoqda Bloomberg.
