O‘zbekistonda o‘tgan bir sutka ichida yana 302 kishida koronavirus aniqlandi

O‘zbekistonda 15-may kuni yana 302 kishida koronavirus infeksiyasi tasdiqlandi, deb xabar berdi Sog‘liqni saqlash vazirligi matbuot xizmati. Bu ko‘rsatkich 14-may kuni 251 nafar, 13-may kuni 291 nafarni tashkil etgandi.

Yangi kasallanish holatlarining:

• 7 nafari Qoraqalpog‘iston Respublikasida,
• 5 nafari Andijon viloyatida,
• 7 nafari Buxoro viloyatida,
• 6 nafari Jizzax viloyatida,
• 6 nafari Namangan viloyatida,
• 73 nafari Samarqand viloyatida,
• 7 nafari Sirdaryo viloyatida,
• 2 nafari Surxondaryo viloyatida,
• 9 nafari Farg‘ona viloyatida,
• 11 nafari Xorazm viloyatida,
• 38 nafari Toshkent viloyatida,
• 131 nafari Toshkent shahrida koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan.

Vazirlik ma’lumotlaridan ko‘rish mumkinki, Samarqand va Toshkentda infeksiyani yuqtirib olish ko‘rsatkichi yuqoriligicha qolmoqda. Shu sababli Samarqand shahridagi barcha ta’lim muassasalariga joriy etilgan karantin 25-mayga qadar uzaytirildi. Kasallanish ko‘rsatkichi yuqori bo‘lgan ayrim davlatlar, xususan, Hindiston va Turkiya bilan o‘zaro aviaqatnovlarga vaqtinchalik cheklovlar joriy etildi.

Sog‘liqni saqlash vazirligining qayd etilishicha, so‘nggi sutkada Qoraqalpog‘iston Respublikasida 25 nafar, Buxoro viloyatida 3 nafar, Jizzax viloyatida 15 nafar, Qashqadaryo viloyatida 2 nafar, Navoiy viloyatida 5 nafar, Namangan viloyatida 6 nafar, Samarqand viloyatida 48 nafar, Surxondaryo viloyatida 12 nafar, bemor tuzalib, kasallikdan sog‘ayganlar jami 92 111 nafarga yetdi va sog‘ayish ko‘rsatkichi 95 foizni tashkil etmoqda.

Shuningdek, 1 nafar koronavirusga chalingan bemor vafot etib, kasallikdan vafot etganlar soni 668 nafarni tashkil qildi.

Ayni paytda tibbiyot muassasalarida 3891 nafar bemor davolanmoqda. Xususiy klinikalarga COVID-19’ga chalingan bemorlarni davolash uchun berilgan huquq muddati 2022-yilning 1-yanvariga qadar uzaytirilgan.