Jizzax va Samarqand viloyatlari bojxona boshqarmasi hamda Davlat xavfsizlik xizmati idoralari vakillari bilan hamkorlikda Samarqand viloyatida o‘tkazilgan tezkor tadbirlarda giyohvandlik vositalarining noqonuniy aylanuvi oldi olindi. Bu haqda Davlat bojxona qo‘mitasi matbuot xizmati xabar berdi.
Tezkor tadbir davomida avvaldan kuzatuvga olingan fuqaro F.B. boshqaruvidagi Epica rusumli transport vositasi belgilangan tartibda ko‘zdan kechirilganida uning saloni orqa o‘rindig‘ida 1 dona polietilen o‘ram borligi aniqlangan. Mazkur o‘ram ochib ko‘rilganida, uning ichidagi modda ekspertiza xulosasiga ko‘ra, sof og‘irligi 1 kilogramm 17 grammni tashkil qiluvchi gashish giyohvandlik vositasi ekanligi ma’lum bo‘lgan.
Tezkor tadbirlar davomida shu kuni Samarqand tumanida istiqomat qiluvchi fuqaro B.B.ning xonadoni ham belgilangan tartibda ko‘zdan kechirilgan va uning yerto‘lasidagi avtomobil balloni shinasi ichidan 3 dona polietilen o‘ramlar topilgan.
Mazkur o‘ramlarning birida 1 kilogramm 25 gramm og‘irlikdagi gashish, qolgan ikkita o‘ramda esa 2 kilogramm 65 gramm og‘irlikdagi opiy borligi aniqlangan.
Shunday qilib, mazkur tadbirlar davomida jami 4,1 kilogrammdan ziyod giyohvandlik vositalari ashyoviy dalil sifatida olib qo‘yilgan. Mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Avvalroq Toshkentda qariyb 100 million so‘mlik kuchli ta’sir qiluvchi dori vositalarining noqonuniy aylanmasiga chek qo‘yilgani, Farg‘onada uyida giyohvand modda saqlab kelgan shaxsga nisbatan jinoyat ishi qo‘zg‘atilgani hamda Andijonda giyohvand moddalarni oyoq kiyimga yashirib o‘tmoqchi bo‘lganlar qo‘lga tushgani haqida xabar berilgandi.
Izoh (0)