Toshkent shahrining Olmazor tumanidagi 15-maktab yonidagi piyodalar o‘tish yo‘liga zamonaviy svetofor o‘rnatildi. Bu haqda “O‘zbekiston 24” telekanalining “Fakt 24” dasturida ma’lum qilindi.
Ma’lum qilinishicha, piyoda o‘tish yo‘lagiga kelishi bilan sensor moslama ishga tushadi va avtomobillar uchun qizil chiroq yonadi.
“Toshkentdagi ayrim tartibga solingan o‘tish joylarida svetoforlar tugmalar orqali tartibga solinadi. Ushbu tugmalar aksariyat hollarda buzilgan yoki doimiy yashil yonishi uchun skotch bilan boylab qo‘yilgan. Mazkur holatda esa o‘tish jarayonida sensorlar ishga tushadi va tegishli svetofor hamda LED-chiroqlar yonadi”, — deydi Toshkent shahar IIBB YHXB boshlig‘i o‘rinbosari Aziz Sadirov.
Ta’kidlanishicha, piyodalar o‘tish yo‘l belgilari ham LED-chiroqlari yordamida yoritilgan bo‘lib, u quyosh panellaridan quvvatlanadi. “Kun bo‘yi quyoshdan energiya olgan svetofor tun bo‘yi ishlashi uchun yetarli”, — deyiladi xabarda.
Kelgusida mazkur loyihani aholi gavjum joylarda qo‘llash rejalashtirilgan.
Eslatib o‘tamiz, 2020-yilning avgustida Xorazmda ko‘chma tartibda olib yurishga mo‘ljallangan innovatsion svetofor joriy qilingandi.
Izoh (0)